Qurlyq áskerleri Áskerı ınstıtýtynda bólim komandıri bolyp júrgen Boranbaev áıeline turmystyq zorlyq-zombylyq kórsetkeni úshin bir jylǵa shartty túrde bas bostandyǵynan aıyrylǵan-dy. Jýyrda jábirlenýshiniń anasy Botagóz Chıderınova bul jazamen múldem kelispeıtindigin aıtyp, qorǵaýshylardan kómek surady. Sebebi, bas súıegi soqqydan shytynap, qyzyna sońǵy ret úsh jerinen ota jasalǵan eken, dep habarlaıdy Qamshy aqparattyq agenttigi Stan.kz saıtyna silteme jasap.
BAQ ókilderimen kezdesý konferensıasyna Dınara Chıderınovanyń ózi de, anasy da keldi. Alaıda kelinshek dálizde talyp qalyp, ony jedel járdemmen aýrýhanaǵa alyp ketti. Sol sebepti, bar oqıǵany anasy baıandap berdi.
2016 jyldyń qyrkúıek aıynda Dınara Chıderınova jataqhanadaǵy bir bólmeli páterin jınap júredi. Búıregi qatty aýyryp, jeksenbi kúni monshaǵa birge barýǵa kúıeýine ótinish bildiredi. Osylaısha ekeýi keshke jaqyn monshaǵa barýǵa kelisip, artynsha kúıeýi úıden shyǵyp ketedi. Saǵat 4-5 shamasynda Dınara Chıderınova kúıeýiniń monshaǵa túsýge kelmeıtinin túsinip, ol ishimdik iship keletin shyǵar degen boljam jasaıdy. Sol kúni dene qyzýy kóterilip, aıaǵyn jyly sýǵa salyp otyrǵan kezde kúıeýi kirip keledi. Artynsha dálizge shyǵyp ketip, 20-30 mınýt shylym shegip júredi. Osydan keıin úıge kire salysymen áıeline bas salyp, basynan judyryqpen ura bastaıdy.
“Kúıeý balam qyzymdy uryp jatqan sátte bólmede 4 jastaǵy nemerem oıanbaı uıyqtap jatqan. Iaǵnı ol tamaǵynan basyp turyp urǵan. Artynsha keregege qaraı qatty ıterip jibergen. Qyzym esin jıa salysymen dálizge qaraı qashqan. Osy sátte kúıeý balam pyshaqqa júgirip ony qorqytqan. Qýanyshyna oraı, Dınarany kórshiler kórip qalyp, ekeýine arasha túsken eken. Qyzymnyń bas súıegi aýyrmaq túgili, shytynap ketken eken. Mundaıdyń birinshi ret bolyp turmaǵanyn ózderińiz de túsinip turǵan shyǵarsyzdar?!” – deıdi Bótagóz Chıderınova.
Jýyrda atalǵan iske qatysty sot otyrysy aıaqtalǵan bolatyn. Sýdıa Boranbaevty shartty túrde bir jylǵa bas bostandyǵynan aıyrǵan eken. Ol sotta áıelin bir ret betinen shapalaqpen, bir ret judyryqpen urǵanyn aıtyp aqtalǵan. Munymen qatar, Dınaranyń anasy kúıeý balasy dárigerlermen kelisip, ony úıge erterek shyǵartqyzǵanyn aıtyp otyr. Ádette jábirlenýshi 21 kúnge deıin aýrýhanada jatatyn bolsa, onyń jaraqaty jeńil bolyp eseptelip, aıyptalýshynyń jazasy jeńildetiledi. Al Dınarany dárigerler bas súıeginiń shytynap ketkenine qaramastan, 5 kúnnen keıin tegin kómek kórsete almaıtyndaryn aıtyp, shyǵaryp jibergen.
“Qyzymnyń artyq minezi joq. Bir shetinen kúıeý balam kúnde ishimdik ishetin dep te aıta almaımyn. Biraq, onyń artyq ketkeni ras. Qyzymnyń betinde saý jeri joq. Tipti, dárigerler onyń bas súıeginiń synǵanyn jasyryp qalmaq bolǵan. Biz otany keıinnen ǵana jasattyq. Bastapqyda dárigerlerdiń sózine senip, jaraqaty ózdiginen jazylatyn shyǵar dep oılap júrgen edik. Qyzym osy kúnge deıin turmysta kórgen zorlyq-zombylyǵyn bizden jasyrdy”, – deıdi Botagóz Chıderınova.
Qorǵaýshy Aıman Omarova atalǵan istiń qaıta qaralyp, Boranbaevtyń ózine tıesili jazany alýy úshin baryn salatynyn aıtyp jatyr.
