Orta salmaqtaǵy WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkın (37-0, 33 KO) orta salmaqtaǵy WBO tujyrymynyń chempıony Bıllı Djo Sonderstiń ónerine baǵa berip, brıtandyq boksshy onyń usynysyn eki ret qabyldamaǵanyn aıtty.

 Bul týraly Qamshy aqparattyq agenttigi Sports.kz-ke silteme jasap  habarlaıdy.

«Men qazirgi ýaqytta Bıllı Djoǵa emes, «Kaneloǵa» qarsy kezdesýge bar nazarymdy aýdaryp júrmin. Bıllı kóp sóıleıdi. Onyń buǵan deıin menimen kezdesetin múmkindigi boldy. Men onymen 4 jáne 10 maýsym kúni kezdesýdi usyndym. Biraq ol «joq» dedi. Al endi men «Kanelomen» kelisimge kelgennen keıin onyń áńgimesi kóbeıip ketti. Eger jekpe-jek ótkizgiń kelse, men qarsy emespin. Meniń promoýterimmen, ózińniń promoýterińmen sóıles. Jekpe-jekti uıymdastyr. Men kezdesýden qashpaımyn. Meniń maqsatym – orta salmaqta barlyq belbeýlerdi jeńip alý», – dep keltiredi Golovkınniń sózin Fight Hub TV.

Aıta keteıik, Golovkınniń aldaǵy kezdesýdegi qarsylasy Alvares Sonderske jekpe-jek ótkizý úshin aldymen salmaq tastap, aryqtaý kerektigin aıtty. Eske salaıyq, Sonders óz belbeýin Golovkın – Alvares boks keshinde Davıd Lemege qarsy kezdesýde qorǵaıtynyn aıtqan bolatyn.
 

Sholýshy: Aıgerim Taýbaı