Úp etken jelge bola qara aspandy tóńkerip, mólt etken sýǵa muhıtty qotaryp, bir aýyz sózben aýyldy órteıtin ápendiler qanshama. Solardyń ishinde ózgesheleý shirenip moıyn jipke qylqynyp, yǵaılardyń qataryn da kóringisi keletin bir kisi bar.
Janyna adam balasy jolamaq túgil, alystan kele jatqanyn kórseń asqazanyń kóteriledi. Tirshilik úshin keıde sondaılarǵa táýeldi bolatyn sátter de kezdesip jatady. Olaı etpeýge lajyń joq. Týra sol álsiz jerińnen ustaýdy ol sennen jaqsy bilip alǵan. Basynan sóz asyrmaıtyny da sondyqtan. Moıynyńa ajyrǵy salyp, erttep jelkeńe minip alyp tepeńdeıtinin qaıtesiń. Keıde, asqynǵannyń ústine asqynyp, qazaqqa til, ar men ıba týraly túsindirgisi kelip eki urty búlkildeı qalatyny taǵy bar.
Ateızmniń jyltpasyna jumyryn ábden maılaǵan kórkeýde toǵyshar baıqus, qyzdy-qyzdymen Qudaıdan qorqýdy umytyp, keıde jaratýshyny syqaqqa kúlkige aınaldyrǵysy keledi. Mine, jurt senip senim artyp otyrǵan naısaptyń kúıi osyndaı.
Aqyl-esi durystaý degenderdiń ózi, osy qorashty qoltyǵynan demep, qolpashtap álek, kótermelep báıek bolady. Qystyq soǵymy men aýjalyn qarasytylǵyndaǵy toǵysharlar toby daıarlaıdy. Jem-shóbin desem artyq bolar...
Negizi olardyń oılap júrgeni, bul «Tulǵanyń» qarastylyǵyn da júrgenin asqan baqyt sezinýdiń jemisi. Olardyń da qaısybiri ońyp turǵany shamaly. Ósek aıtyp jurtty shaǵystyrýdan qara úzedi. Aldyna jan salmaıdy.
Jegi qurttyń oılap tappaıtyn bálesi joq. Jumys demalysyn da qaradaı ishi qyzyp, qyzylkózdik qasıeti oıanyp tynyshta uıyqtaı almaıdy. Nege deısiz be, jumys bastala salysymen basqalardy jamandap, qarastylyǵyndaǵy adamdardy júndeı tútip, jer-jebirine jetip boqtaıdy. Sodan lázzat alatyn sekildi me, ol jaǵyn túsingen jan balasy ázirge joq.
Orynsyz ákireńdep, qarǵap-silep qazbalap áke-shesheden túsip balaǵattaýdyń qas sheberi. Dıplom jumysyn «Anaıy sózderdiń aǵzaǵa áseri»,- degen taqyrypta eki myń dollar tóleý arqyly qorǵap shyqqanyn aıtar bolsaq, siz, bizdi jek kórýińiz bek múmkin. Alaıda shyndyq osy. Ne deseńiz de erkińiz bilsin! Shýyldaǵan qyz-qyrqyndy jınap alyp, daýryǵyp aıǵaı salyp, shampan atyp sharap iship shalqyǵan da baryp, onyń naǵyz kespirin kórýge bolady. Oǵan deıin ony tanýǵa tyrysýdyń qajeti joq.
Adamdy jamandap baqyt tappasymyz anyq. Alaıda kóre tura jaq ashpaı qalýǵa bolmady. Sońǵylarǵa eskertýimiz bolsyn degen oımen qozǵap otyrmyz. Jurttar aǵash atqa mingizgen de, taqymy aýyrmasyn dep kópshik salyp báıek boldyq. Teksiz báribir teksizdigin dáleldedi. Osy joly ol oıymyzdan aınyp qaldyq.
Ótirik kópirme sózdi sýdyratyp, tilimen ózinen joǵarǵylardyń kebisin tazalaıtyn bolsa halyqaralyq dárejedegi sport sheberi, bireýdiń syrtynan domalaq aryz jazyp, bále shyǵarýǵa kelse álem shempıony bola alady. Búkil ǵumyryn «Ózimnen basqa eshbir janǵa jaqsylyq jasamaý kerekpin»,-qaǵıdasyn berik ustanǵany sonsha, keskin –kelbetinen kim ekeni menmundalap turady.
Záýdeǵalam bireý jetistikke jetip, qýanyshqa kenelse, bul sabazyń ıne jutqan ıtteı qylǵynyp dóńbekshıdi-aı kelip. Onyń tek ózine ǵana tán ıt minezimen toǵysharlyq qasıeti osyndaı. Osynaý jersharyn tek bir ózi ıemedenip, bir ózi ǵana ómir súretindeı sezinýi ókinshti. Báribir syrtynan shýyldaımyz ǵoı, qulaǵy tynysh qalsyn ba... Jegi qurt túbi ózin jep tynatyny aqıqat.
K.BOǴYDABAEV
