Táýelsiz elimizdiń damý jolynda bilim men ǵylymǵa keńinen kóńil bólip, asa nazar aýdarýy tegin emes. Eldiń bolashaǵyn qolyna ustaǵan jas órenderdiń tulǵa bolyp qalyptasýyna tikeleı áser etetin – pedagogıka salasy. Halqymyz álimsaqtan-aq joǵary baǵalaǵan ustazdyq joly búgingi tańda da ulylyǵyn joıǵan emes.

«Jaqsynyń jaqsylyǵyn aıt, nury tasysyn» dep, dana halqymyz aıtyp ketkendeı, men de shákirt retinde ustazdarymnyń ulylyǵyn ulyqtap, adam balasy súısinip qaraıtyn ıgi isterin dáriptegim keledi. 

«Men ózimniń ustazyma ákemnen kem qaryzdar emespin:ákemnen ómir alsam, al Arıstotelden ómirimdi jaqsy ótkizý týraly bilim aldym» dep, Aleksandr Makedonskıı ustazyna degen qurmetin bildirgen eken. Sol sekildi, maǵan ata-anam ómir syılasa, ómirdegi baǵytymdy kórsetip bergen ustazym, Qyzylorda oblysy, Qazaly aýdany, №91 orta mekteptiń joǵary sanatty muǵalimi Aınur Qoıanbaıqyzyn atap ótkim keledi. Bulaq kórse, kózin asha biletin bilikti pedagog, jan-jaqty muǵalimim meniń boıymdaǵy azǵantaı darynymdy baıqap, durys jol siltegen meniń mekteptegi de, ómirdegi de ustazyma aınaldy. Ustazyma shyǵarashylyq tabys tileı otyryp, shákirttik lebizimdi júregimnen shyqqan jyr joldary arqyly bildirgim keledi.

Apaıym – aq júrekti, altyn adam
Maǵan jaqsy muǵalim bárinen de qymbat, 
óıtkeni ol muǵalim – mekteptiń júregi
Y.Altynsarın

Dana hám danyshpan bop jaratylǵan,
Bar adam eńbeginen tabatyn mán.
Tabysy – shyńǵa shyqqan shákirt bolyp,
Ár isi kópke máshhúr dara turǵan.

İsińniń izgi tunǵan ońdy bári,
Usyndyń kóp shákirtke mol murany,
Jolyma óshpesteı qyp jaryq jaqtyń,
Qolyma berip qalam, dombyrany.

Óleńniń negizi – siz men quraǵan,
Ónerdiń ordasyna keń kire alam.
Bizdeı shákirt keledi-aý áli sizge,
Sizdeı ustaz jolyqpas endi maǵan.

Ataıyn jaqsylyǵyn sán quraǵan,
Apaıym – aq júrekti, altyn adam.
Meni de elegensiz, senim artyp,
«Elińe júldyz bol dep jarqyraǵan».


Qalamdy shyn baq kórip qolǵa ustaǵan,
Ǵalamdy tań qaldyrar zor kúsh tabam.
Jarqyrap, júldyz bolyp tursam da men,
Siz maǵan Kún bolasyz jol nusqaǵan.

Sózderimdi tursa da tyńdap ǵalam,
Sizge shákirt boldym dep shyn maqtanam.
«Orazaly Aınurdyń oqýshysy»,
Degen ataq bárinen qymbat maǵan!

QazUÝ, «Fılologıa jáne álem tilderi» fakúltetiniń stýdenti Elnur NURQASYM