Ońtústik Qazaqstan oblysynda  jol apaty bolyp, onyń saldarynan ákiminiń keńesshisi men depýtat qaza boldy, dep habarlaıdy Qamshy.kz aqparat agenttigi okg.kz-ke silteme jasap habarlaıdy.  Osy oqıǵaǵa baılanysty taratylǵan málimetterge qaraǵanda, marqum bolǵan azamattar otyrǵan "Toıota Prado" kóligin 1985 jyly týǵan túrkistandyq azamat basqarǵan. 32 jastaǵy júrgizýshi qazir Túrkistan qalalyq aýrýhanasynyń jansaqtaý bóliminde jatyr. Dárigerler onyń jaǵdaıyn óte aýyr dep baǵalap otyr.  Túrkistan qalasynyń prokýrory Rýslan Ábdiraıymovtyń aıtýynsha, rólde bolǵan júrgizýshiniń Seıit Ertaı men Qamytbek Aıtóreevke týystyq qatynastary joq. Ol zıarat etip kelgen depýtat pen keńesshini alyp júrgen. Al jol jıeginde kóligi buzylyp turǵandar Saıram aýdanynyń turǵyndary ekeni anyqtaldy. 40 jastaǵy Qarabulaq aýylynyń turǵyny ulymen birge Iqan aýlylynan Gaz-53 avtokóligine qarbyz artyp, úıine qaıtyp kele jatqan. Jolda kóligi buzylyp qalady. Jol jıeginde turǵan olardy Toıota Prado kóligi soǵypty. Jol kólik oqıǵasynan ákeli balaly eshqandaı zardap shekpegen.

Eske salaıyq, keshe kúndiz saǵat 13-00-der shamasynda Shymkent-Samara tasjolynyń 107 shaqyrymynda jol jıeginde buzylyp turǵan Gaz-53 avtokóligine Toıota Prado kóligi soqtyǵysyp, sonyń saldarynan eki jolaýshy qaza tapqan edi. Baqılyq bolǵandar Ońtústik Qazaqstan oblys ákiminiń keńesshisi Seıit Ertaı men oblystyq máslıhattyń depýtaty Qamytbek Aıtóreev edi. Al, Toıota kóliginiń júrgizýshisi aýrýxanada jansaqtaý bólimine túsken bolatyn. Qazirgi tańda osy oqıǵa boıynsha Qylmystyq kodekstiń 345 baby 4 bóligimen is qozǵalyp, sotqa deıingi tergep-tekserý júrgizilýde. Qylmystyq isti OQO İİD-niń Anyqtaý basqarmasy qaraýda.