Ońtústik Qazaqstan oblysynda gazettiń bas redaktory kásipkerden 5 mln. teńge bopsalamaq bolǵan. Ózin Memlekettik kiris departamentine qarasty ekonomıkalyq tergeý bóliminiń qyzmetkerimin dep tanystyrǵan jýrnalıs kásipkerge qamqorlyq jasaımyn dep aqsha talap etken, dep habarlaıdy Qamshy.kz aqparat agenttigi  QazAqparat málimetine súıenip. 

Oblystyq Memlekettik kiris departamentiniń baspasóz qyzmetiniń málimetinshe, gazettiń bas redaktory oblystyq prokýratýranyń janynda kásipkerden 100 myń teńgesin alyp jatqan jerinen ustalǵan.

«Bıylǵy jyldyń 17-shi shildesi kúni Ońtústik Qazaqstan oblystyq Memlekettik kirister departamentiniń ishki qyzmet basqarmasynyń ókilderi oblystyq İİD uıymdasqan qylmysqa qarsy kúres basqarmasymen birlese otyryp, Mýkovnıkov D. A degen azamattan 100 myń teńge alyp jatqan jerinen Ómirálıev Ǵanı Bekqojaevıchti ustady. Ol «Qoǵamdyq baqylaý» gazetiniń bas redaktory bola tura ózin Memlekettik kiris departamentine qarasty ekonomıkalyq tereý bóliminiń qyzmetkerimin dep tanystyrǵan. Tintý kezinde onyń qaltasynan 100 myń teńge men óńirlik Memlekettik kiris departamenti qyzmetkeri degen jalǵan kýálik tabyldy» delingen baspasóz málimdemesinde.

Jýrnalıs alaıaqtyq áreket jasaý maqsatynda Mýkovnıkovke oıyn bıznesine qamqorlyq jasaımyn dep, odan bas-aıaǵy 5 mln. teńge talap etken. Qazirgi tańda 1983 jyly týǵan gazettiń bas redaktory Oblystyq İİB ýaqytsha tereý abaqtysyna qamaýǵa alyndy. Onyń ústinen Qylmystyq kodekstiń 128-shi babymen is qozǵalyp, tergeý amaldary júrgizilýde.

Aıta keteıik, bul óńirde jýrnalısiń bopsalaý deregi boıynsha ustalǵan birinshi oqıǵa emes. Buǵan deıin respýblıkalyq «Ádilet» gazetiniń bas redaktory Qýanysh Botabekov halyqtan qyrýar qarajat bopsalady dep aıyptalyp, 7 jyl 6 aıǵa sottalǵan bolatyn. Ol qazir jazasyn qatań tártiptegi kolonıada ótep jatyr.