Almazbek Atambaev prezıdenttik saılaýdyń kez kelgen nátıjesin qabyldap, beıbit túrde bılikti beretinin málimdedi dep habarlaıdy Qamshy.kz aqparat agenttigi Knews.kg-ge silteme jasap.

 Dúısenbi kúni Esik kóli aýmaǵynda Atambaevtyń jylda uıymdastyrylatyn pres-konferensıasy ótip jatyr. Oǵan 70 shaqty respýblıkalyq, aýdandyq jýrnalıser jáne halyqaralyq BAQ ókilderi, saıasatkerler, sarapshylar  qatysyp jatyr.

 Dástúrli jazǵy pres-konferensıa Atambaevtyń bılik basynda bolǵan 6 jyl ýaqytyn qorytyndylaý ispetti. 1  jeltoqsanda onyń prezıdenttik ýákilettiligi toqtaıdy. Al 15 qazanda kezekti prezıdenttik saılaý ótedi. Konstıtýsıaǵa saı, qazirgi prezıdent oǵan qatysa almaıdy.

 «Men prezıdent retinde sońǵy pres-konferensıamdy ótkizip jatyrmyn. Eki jarym aıdan keıin halyq jańa prezıdentti tańdaıdy. Barlyǵyn jasap úlgermegenim ókinishti, alaıda áli de úlgeremin dep úmittenemin» dedi Atambaev.

 Ol kez kelgen prezıdenttik qorytyndyny qabyldaýǵa ázir ekenin de atap ótti.

 «Saılaýdyń nátıjesi qandaı bolsa da ony qabyldaý kerek. Esepteý ádil túrde júrgiziletinine jáne bılikti beıbit túrde tabys etetinime kepildik beremin» dedi Qyrǵyzstan prezıdenti.

 Prezıdent saılaýynyń qorytyndysy úshin ýaıymdaıtynyn da jetkizdi.

 «Qazir prezıdenttikke úmitkerler jaqynda ǵana elde birinshi jáne ekinshi sortty adamdar bar ekenin málimdegen. Bizdiń halyq óte sengish jáne keshirimdi. Alaıda saıasatkerlerge keshirýge bolmaıtyn jaǵdaılar bolady. Eshqandaı bir kúndik mártebe eldegi jaǵdaıdyń ýshyǵýyn aqtaı almaıdy» dedi ol.