«Týǵan jer» baǵdarlamasy aıasynda Almaty oblysyndaǵy Orbulaq shaıqasy bolǵan jerge eskertkish qoıyldy. Salmaǵy jarty tonna taqtada «Qazaq eliniń táýelsizdigi men erkindigi úshin jońǵar basqynshylarymen shaıqasta jeńiske jetken aıbyndy qazaq sarbazdaryna urpaqtary atynan!» degen jazý bar,  dep habarlaıdy Qamshy.kz aqparat agenttigi  24.kz málimetine súıenip.

Bul osydan tórt ǵasyrǵa jýyq ýaqyt buryn jońǵardyń 50 myń áskerin 700 qolmen toqtatqan qazaq sarbazdarynyń rýhyna baǵyshtalǵan shara. Sebebi mundaı jeńis álem tarıhynda bolǵan emes. Keler jyly Orbulaq shaıqasynyń 375 jyldyǵyn el bolyp atap ótkeli otyrmyz. Búgingi shara sol tarıhı mán-maǵynasy zor toıdyń aldyndaǵy tamasha syı boldy deıdi qonaqtar.

- Bul aýyzbirshiliktiń jeńisi. Sol jeńiske, mine, 375 jyl tolýy qarsańynda jastar jınalyp kelip, myna belgini qoıyp jatyrmyz. Babalarymyz rıza bolsyn, solardyń rýhyna biz rızamyz degen sóz. Kelesi jylǵy úlken toıdyń aldyndaǵy bul úlken bir shara boldy, dedi jazýshy Beksultan Nurjekeev.