Almatylyq sýretshi Azamat Ánýarbek Alash kósemi Álıhan Bókeıhannyń portretin shegemen salyp shyqty, dep habarlaıdy Qamshy.kz aqparat agenttigi QazAqparatqa silteme jasap.

«On oılanyp, júz tolǵanyp, alǵashqy mahabbatymdaı aıalap, tuńǵyshymdaı tolǵanyp, dáretsiz qol tıgizbeı mápelep, qazaqtyń maqtanyshy, Alash Orda kósemi - Álıhan Bókeıhanuly babamnyń, pýantalızm tehnıkasymen salynǵan portretin salyp shyqtym. Jalań aǵashqa temir shegemen. Ne sebepti temir shegemen salynǵanyn ısi qazaq júregimen sezinip, túısigimen uǵynýy qajet. Qalǵanyna ókpem joq. Alash Orda memleketiniń 100 jyldyq mereıtoıyna arnalatyn kórmeniń alǵashqy qarlyǵashy», - dedi sýretshi óziniń Feısbýktegi paraqshasynda.

Aıta ketý kerek, buǵan deıin Azamat belgili bokser Gennadıı Golovkınniń sýretin salyp shyqqan bolatyn.

«Temir Genanyń» avtory Alash zıalylarynyń sýretin salýdy burynnan josparlap júrgenin aıtty. «Golovkındi shegemen salýym ult kósemderin salý aldyndaǵy ózime ózim jasaǵan emtıhan boldy. Ábden kózim jetti shegemen sýret sala alatynyma. Alash kósemderiniń sýretin salý burynnan oıymda bar bolatyn. Sýretimdi Astanaǵa ákeldim. Qazir el arasynan Atymtaı jomarttar tabylyp, demeý kórsetemiz dep jatyr», - dedi Azamat.

Onyń aıtýynsha, temir portretti salýǵa 1500-1700 shege ketken. Avtor jumysty 4-5 kúnde aıaqtaǵan.

«Trafaret kúıinde sýretshi dosym Dýlat Álı kómektesti. Qazbek dosym shege qaǵýǵa qol ushyn berdi. Shegeni urǵylaýdan saýsaqtarym eshteńe sezbeı qaldy. Ondaı jumysty jasaýǵa úlken tózim kerek», - dedi ol.

Avtor bolashaqta demeýshiler tabylyp jatsa, Alash Ordasynyń qurylǵanyna 100 jyl tolýyna oraı Alash úkimeti kósemderi beınelengen 25-30 sýret salyp, búkil Qazaqstandy kórmemen aralap shyqsam degen oıyn jetkizdi. Onyń aıtýynsha, sapar Astanadan bastalyp, Semeıde aıaqtalmaq.