Búgin Almaty qalasynda Qazaqstan Respýblıkasynyń Tuńǵysh Prezıdenti – Elbasy Qory janyndaǵy Álemdik ekonomıka jáne saıasat ınstıtýtynyń (ÁESI) uıymdastyrýymen «2017 j. mamyrda ótken «Beldeý men jol» forýmynyń qorytyndysy aıasynda Ortalyq Azıa elderi men Qytaı arasyndaǵy ózara yqpaldastyqtyń bolashaǵy» taqyryby boıynsha dóńgelek ústel ótti, dep habarlaıdy Qamshy.kz aqparat agenttigi Álemdik ekonomıka jáne saıasat ınstıtýtynyń baspasóz qyzmetine silteme jasap.

Dóńgelek ústel jumysyna Qyrǵyzstan, Ózbekstan men Tájikstannyń sarapshylary, ÁESI analıtıkteri, sonymen qatar, Qazaqstannyń aldyńǵy qatarly mamandary qatysty. Olardyń qatarynda: Qyrǵyz Respýblıkasy Strategıalyq zertteýler ulttyq ınstıtýtynyń dırektory (QR SZUI) Azamat Dıkambaev, Tájikstan Respýblıkasynyń Prezıdenti janyndaǵy Strategıalyq zertteýler ortalyǵynyń (SZO) analız jáne boljaý basqarmasynyń basshysy Abdýllo Hakım, QR Prezıdenti janyndaǵy QSZI bas ǵylymı qyzmetkeri Konstantın Syroejkın, «ChinaCenter» Qazaqstan-Qytaı seriktestigi halyqaralyq ortalyǵynyń bas dırektory Ádil Kaýkenov, Qoǵamdyq máseleler analızi ortalyǵynyń dırektory Merýert Mahmýtova, «Ekspert-Kazahstan» iskerlik jýrnalynyń bas redaktory Sergeı Domnın, Aleksandr Knázev, Bahtıer Ergashev (Ózbekstan Respýblıkasy) jáne t.b. táýelsiz sarapshylar bar.

ÁESI dırektory Erjan Saltybaevtyń sózinshe, búgingi tańda «Beldeý men jol» qytaılyq bastamanyń damýy aıasynda Qytaı-Ortalyq Azıa formatyndaǵy baılanystar keńeıtilýde: «Ortalyq Azıa aımaǵynyń barlyq elderi shyǵystaǵy kórshimen tyǵys qarym-qatynasta. Aımaqtaǵy elder aldynda olardyń ekonomıkalyq jáne kólik-ınfraqurylymdyq damýyn arttyratyn jańa múmkindikter paıda bolýda».

- Sonymen qatar, Ortalyq Azıada atalmysh bastama aıasynda jańa geoekonomıkalyq jaǵdaıdyń qurylýy múmkin bolatyn qaterlerge baǵa berý jaǵynan sarapshylyq uǵynýǵa muqtaj, - dedi E.Saltybaev.

Dóńgelek ústelge qatysýshylar Ortaazıalyq aımaqtaǵy árbir eldiń Qytaımen seriktestigi prosesin, ınvestısıalyq seriktestiktiń qazirgi ahýaly, óńir memleketteri men QHR arasynda jıi týyndaıtyn túıtkildi máseleler, óńir memleketteri arasyndaǵy seriktestiktiń jaǵdaıy, sonymen qatar, Qytaıdyń «Beldeý men jol» bastamasyna ary qaraı qatysýdyń bolashaǵy sekildi taqyryptardy talqylady.