Mysyrda ustalǵan qazaqstandyq alty azamat elge qaıtyp jatyr, dep habarlaıdy Qamshy.kz aqparat agenttigi. Bul týraly QR SİM baspasóz qyzmetiniń jetekshisi Ánýar Jaınaqov Feısbýktegi paraqshasynda málim etti.

«Qazaqstandyq dıplomattar elimizdiń 6 azamatyn Qazaqstanǵa qaıtarý úshin olardy Kaır áýejaıyna jetkizedi.

1 tamyzda keshki ýaqytta Mysyrdyń Ulttyq qaýipsizdik qyzmeti Qazaqstan elshiligimen baılanysqa túsip, ustalǵan qazaqstandyq jastardyń elge qaıtarylatynyn habarlady.

Qazaqstan elshisi birden áýejaıǵa bet alyp, qazaqstandyq azamattarmen kezdesti. Jaqyn ýaqytta 6 azamat Qazaqstanda bolady. Olardyń jaǵdaılary jaqsy», - dep jazdy Jaınaqov.

Alaıda azamattardyń ustalý sebebi áli anyqtalmaǵan. Mysyr bıliginiń málimetinshe, quqyq qorǵaý organdary qazaqstandyqtardyń ustalýyna baılanysty qosymsha málimet beredi.

Aıta keteıik, birneshe kún buryn qazaqstandyq 6 stýdenttiń Msyryda iz-tússiz joǵalǵany habarlanǵan. İzdeý jumystary nátıjesinde 6 stýdentti Kaırdiń quqyq qorǵaý organdary ustap otyrǵany anyqtaldy.