«Taý sportynyń Almatydaǵy týrızmdi damytýǵa yqpaly» degen taqyrypty talqylaýǵa arnalǵan úsh kúndik halyqaralyq «İnternational Mountain Sports Festival» festıvali Shymbulaq taý-shańǵy kýrortynda óz jumysyn bastady, dep habarlaıdy Qamshy.kz aqparat agenttigi.
Festıváldi resmı ashyp bergen Almaty qalasy ákiminiń orynbasary Arman Qyryqbaev taý sporty týrızmdi damytýdyń basty baǵyttarynyń biri ekenin aıtty.
«Taý sporty - Almaty úshin mańyzdy máseleniń biri. Búgingi forýmnyń maqsaty tájirıbe almasý. Bizdiń qonaqtarymyzdyń arasynda álemdik kompanıalardyń top-menedjerleri shaqyrtylyp otyr. Olar taý kýrorty máselesin jetik biletinder. Almaty Qazaqstan ǵana emes, Ortalyq Azıa boıynsha taý-shańǵy kýrortynyń ortalyǵy bolýdy maqsat tutyp otyr. Almaty - Qazaqstannyń ekonomıkalyq lokomotıvi. Almatyda 600-ge jýyq týrısik kompanıa bar. Jyl basynan beri 200 myń adam Almatyǵa qonaqqa kelgen. Búgingi forýmda qonaqtar óz tájirıbesin, álemniń aldyńǵy qatarly tájirıbesimen bólisedi dep oılaımyz», - dedi Arman Qyryqbaev.
Aıta keteıik, 28-30 shilde aralyǵynda «Shymbulaq» taý-shańǵy kýrortynda «İnternational Mountain Sports Festival» halyqaralyq taý sporty festıvali ótedi. Festıvál búgin forýmmen bastalyp, erteń jalpy halyqqa arnalǵan merekelik sharalarǵa ulaspaq. Forýmnyń úshinshi kúni alpınıada ótkiziledi. Buǵan deıin arnaıy baspasóz máslıhatynda sharanyń mańyzdylyǵy týraly sóz qozǵaǵan Almaty qalasynyń Dene shynyqtyrý jáne sport basqarmasynyń basshysy Ábil Dóńbaev bıyl bul festıváldiń aıasyn keńeıtip, byltyrǵymen salystyrǵanda mazmundyq jaǵyna kóp mán berilip otyrǵanyn aıtqan bolatyn.
«Osy festıváldiń aıasyn keńeıtip otyrmyz. Byltyr bir kún ǵana bolsa, bıyl týrızm salasyndaǵy sarapshylardy shaqyrtyp, jan-jaqty talqylaýdy oılastyrdyq. Maqsatymyz - Medeý, Shymbulaq shatqalynyń tolyq múmkindigin tanytý», - degen bolatyn ol.
Bul sharaǵa Olımpıada chempıondary, tanymal sportshylar shaqyrtylǵan. Jeksenbi kúni alpınıada tańǵy saǵat 5-ten bastalady. Oǵan balalar men eresekterdi 4000 metrlik shyńǵa aparady.
