Tájikstannyń Dýstı aýdanyndaǵy jergilikti ımam-hatıberge saqal qoıýǵa ruqsat berildi, talaby – uzyndyǵy 3 santımetrden aspaý kerek, dep jazady Qamshy.kz aqparat agenttigi.

Bul týraly aýdandyq hatıbıa basshysy Salohıddın Radjabzoda jýrnalısermen áńgimesi barysynda málimdedi. Sheneýniktiń aıtýynsha, 3 santımetrli saqal tájikterdiń mádenıeti men dinine sáıkes keledi.

Dýstı aýdanyndaǵy Ortalyq meshittiń ımam-hatıby Nasrýllo Faızýlloev bılik organdarynyń málimdemesine birinshi bolyp pikir bildirdi. Jergilikti Radıo Ozodı portalymen suhbatynda hanafıt mazhaby izbasarlarynyń saqalynyń uzyndyǵy judyryqtan aspaý kerek ekenin aıtty. Saqal qoıýdyń mundaı erejesi 2012 jyldyń qarashasynda Tájikstanda ótken ýlem keńesinde bekitilgen.

Tájikstanda 2014 jyldan bastap memlekettik qyzmetkerlermen qatar meshitterdiń ımam-hatıbteri de jalaqy alady. Eldegi ımam-hatıbetrdiń sany – 265. Ózge de din músheleri men konfesıa ókilderine jalaqy berilmeıdi.

2009 jyly Tájikstanda ustazdyq qyzmettegi 50 jastan asqan er adamdarǵa saqal qoıýǵa ruqsat etilgen. Uzyndyǵy 3 santımetrden aspaý kerek degen talap boldy.

Al 2 jyl buryn elde saqaldylarǵa qarsy narazylyq naýqany bastaldy. Mılısıa qyzmetkerleri saqal ósirip alǵan júzdegen er adamdy ustaǵan. Tergeý jumystarynan soń kúsh qoldaný arqyly saqaldaryn qyrǵyzǵan.

Tájikstan İİM atalmysh naýqanǵa qatysy bar-joǵyn jasyryp qalǵan. 2015 jyldyń kókteminde quqyq qorǵaý organdary azamattardyń saqalyn kúshtep qyrǵyzǵan eki mılısıa qyzmetkeriniń ustalǵanyn habarlaǵan.

Sarapshylardyń pikirinshe,  tájik bıliginiń saqal qooıýǵa tyıym salýy radıkalızmmen kúres aıasynda júrgizilgen.