Tarbaǵataı aýdanynyń ortalyǵy Aqsýatta ótken sýyryp salma sóz aıtysyna elimizge belgili aıtyskerler: Rınat Zaıytov, Aspanbek Shuǵataev, Rústem Qaıyrtaıuly, Jansaıa Mýsına, Kalıjan Bildásh, Ásem Erejeqyzy, Shuǵaıyp Sezimxan, Erlan Dáýletuly (Mońǵolıa), Jarqynbek Berdibekuly (Qytaı), Muhtar Nıazov, Maqsat Aqanov, Qýanysh Sharmanov qatysty dep habarlaıdy Qamshy.kz aqparat agenttigi. Elimizdiń ár óńiri men shetelden jınalǵan ot aýyzdy, oraq tildi aqyndar tarıxqa toly Aqsýatty jyrǵa qosyp, kıeli mekenniń rýhyn asqaqtatty. Dúrkirep ótken aıtysta aqyndar sonymen qatar, týǵan jer, ósken elge qurmet, ulttyq dástúrlerimizdi ulyqtaý, ótkenimizdi umytpaý syndy ózekti taqyryptardy tilge tıek etip, kórermenderdiń ystyq yqylasyna bólendi. Shabyty sharyqtaǵan sóz sheberleriniń otty jyrlary men oınaqy oramdary aıtysty dýmandy keshke aınaldyrdy.
Aıtýly sharany Qazaqstannyń Eńbek sińirgen qaıratkeri, Qazaqstan aıtys aqyndary men jyrshy termeshilerdiń halyqaralyq Odaǵynyń tóraǵasy Júrsin Erman júrgizdi. Óner básekesiniń Bas júldesin (2 mln. teńge) Rústem Qaıyrtaıuly qanjyǵasyna baılady. Birinshi oryndy Rınat Zaıytov (1 mln. teńge), ekinshi oryndy Jansaıa Mýsına (750 000 teńge), úshinshi oryndy Qytaıdan kelgen qandasymyz Jarqynbek Berdibekuly (500 000 teńge) enshiledi. Muhtar Nıazov jáne Aspanbek Shuǵataev 300 000 teńgeniń arnaıy syılyǵyna ıe boldy. Al, eki aqyn Qalıjan Bildásh pen Shuǵaıyp Sezimxanǵa «TasKredıt» kompanıasynyń atynan «Aqsýat aıtysy» atty arnaıy stıpendıa taǵaıyndaldy. Stıpendıa ıegerleri bir jyl boıy aı saıyn 100 000 teńge kóleminde stıpendıa alyp turady.
Shara aıasynda Tarbaǵataı óńiriniń ótkeni men búgini týraly syr shertetin «Tarıhqa toly Tarbaǵataı» atty kitaptyń tusaýkeser rásimi ótti. Sonymen qatar, ata-babalarynyń rýxyna arnap quran baǵyshtalyp as berildi.
