Álemge tanymal National Geographic telearnasy EKSPO-2017 halyqaralyq mamandandyrylǵan kórmesiniń basty nysany - «Nur Álem» sferasy týraly derekti fılm túsirdi. Qala kórkinen shabyt alǵan túsirilim toby bir ǵımarattyń ǵana emes, en dalada boı kótergen tutas Astananyń qalyptasý tarıhyn beıneleýdi uıǵardy, dep habarlaıdy Qamshy.kz aqparat agenttigi QazAqparatqa silteme jasaı otyryp.

Fılm «Býrdj-Halıfa» (Dýbaı), Petronas (Kýala-Lýmpýr), Eýrotonnel (La-Mansh buǵazy) syndy álemniń ataqty ǵımarattarynyń qurylys tarıhy kórsetiletin «Megaǵımarattar» (Megastructures) derekti serıalynyń bir epızody bolyp tabylady. Onda Qazaqstan astanasyndaǵy qolaısyz aýa raıy men kúrdeli logıstıkalyq, ınfraqurylymdyq jaǵdaılarǵa qaramastan iri nysandardyń, onyń ishinde jańa vokzal men áýejaıdyń turǵyzylýy týraly baıandalady jáne basty nazar shynydan turǵyzylǵan álemdegi eń úlken sferalyq ǵımarat «Nur Álem» sferasyna aýdarylady. National Geographic túsirilim toby sferanyń sońǵy shynysy ornatylǵan tarıhı mezetti túsirip aldy.

Túsirilim jumystaryna Qazaqstan Prezıdenti Nursultan Nazarbaevtyń ózi qatysyp, jańa astananyń boı kóterýi týraly baıandap berdi.

45 mınýttyq «Megaǵımarattar: Astana - bolashaqtyń qalasy» fılminiń aldyn ala kórsetilimi búgin Astanadaǵy EKSPO-2017 kesheninde ótti. Fılmniń álemdik tusaýkeseri 10 tamyz kúni 40-tan astam memlekette jáne 22 tilde usynylmaq. «Fılmniń tusaýkeseri negizgi National Geographic channel arnasynda ótedi jáne Ulybrıtanıa, Italıa, Ispanıa, Polsha, Sıngapýr, Úndistan sekildi barlyq Eýrazıa aýmaǵynda eki jyl boıy kórsetiledi. Ázirge kórsetilimniń naqty sany belgisiz», - deıdi National Geographic Partners, Eýropa-Afrıka bóliminiń atqarýshy vıse-prezıdenti Debora Armstrong.