Búgin, Máskeý qalasynda  Elshiliktiń muryndyq bolýymen elimizge  teńdesi joq aqyn Sara beınesin somdaǵan qylqalam  týyndylary men músinsheleri jiberildi. Bul týraly Qamshy.kz aqparat agenttigi Qazaqstannyń Reseıdegi elshiligine silteme jasap habarlaıdy.

12 týyndynyń avtory - 1907- 2005 jyldar aralyǵynda ómir súrgen reseılik músinshi, arhıtektor Margarıta Vashenko.  Ol Almaty oblysynda eńbek etken 1955-1960 jyldar aralyǵynda osy sýretterdi somdaǵan.  Qundy týyndylarmen birge óner ıesiniń Qazaqstanda eńbek etken jyldary jınalǵan arhıv qujattary, hattar men gazet úzindileri joldandy.

Margarıta Vashenko, qazaqstanda eńbek etken jyldary Almaty oblysy Aqsý aýdanynyń Jansúgirov jáne Kóshkental aýyldarynda aqyn Saranyń músinderin, Jansúgirov aýylynda Ilás Jansúgirovtyń músinin jáne Taldyqorǵan oblystyq murajaıynda Ǵanı Muratbaevtyń beınesin tasqa túsirgen ataqty arhıtektor.

Osy kúnge deıin sýretter toptamasyn kózdiń qarashyǵyndaı saqtap kelgen Gelıa Tımofeeva,  bul anamnyń maǵan qaldyrǵan amanaty, sony búgin oryndaýdyń reti tústi deıdi.  

"Naq-Birlik" Qoǵamdyq uıymnyń tóraıymy, Almaty oblysy analar alqasynyń múshesi Saltanat Meńlibaevanyń aıtýynsha, aqyn Saranyń ǵasyrlyq toıyn toılaǵan kezde Gelıa Tımofeeva anasynyń qaldyryp ketken murasyn syıǵa tartpaq nıetin haty arqyly bildirgen. Sol kezden beri Gelıa apaımen hat jazysyp kelgen qoǵam basshysy, endi  qundy muralar Almaty oblysy  Aqsý aýdany  Qapal aýylynda oryn tepken  aqyn Saranyń murajaıynda saqtalatynyn aıtady.

Gelıa Tımofeevanyń aıtýynsha, anasy Sara aqynnyń beınesin týǵandary men jaqyndarynyń sýretteýinshe qaǵaz betine túsirgen eken.

Esterińizge sala keteıik, Sara  Tastanbekqyzy (1853-1907) – ataqty sýyryp salma aqyn, sóz maıtalmany, aıtys óneriniń qaıtalanbas sheberi. Almaty oblysynyń Qapal aýdanynda dúnıege kelgen.

1906 jyly oılamaǵan jerden naıman elin aralap, serilik jasap júrgen ataqty Birjan salmen kezdesip, sharshy toptyń aldynda onymen aıtysýy úlken sebepshi bolady.

Sara Tastanbekqyzynyń Birjan salmen aıtysy ǵasyrdan ǵasyrǵa úzilmeı jalǵasyp kele jatqan qazaqtyń aıtys óneriniń shoqtyǵy bıik, kórkem úlgisi bolyp sanalady. Sózge tapqyrlyǵymen, kesip aıtar sheshendigimen eldi súısintken, aıtys ónerge ábden tóselgen Sara Arsalań, Nıazbek sal, t.b. aqyndardy óner jarysynda jeńgen.