Sý-sý bolyp,

Jańbyr keship, malmańdaı,

Men áli de kóretuǵyn tań bardaı,

Jettim, mine,

Seńgir keship, sel keship,

Meni áli de túsinetin jan bardaı. 

Siz turdyńyz,

Ornyńyzdan sál ǵana,

Jeńil ǵana sálemdesip sodan soń,

Keskin kórdim kóz qadaǵan tańǵala,

Álsiz bergen sálemimdi alǵan soń.

Al, men bolsam asyqpaımyn, baıaǵy,

Sýyq Taýdan, sýyq jaqtan oralǵam.

Mendik muńnyń basy da joq, aıaǵy,

Shendilerge sher tógýden arlanǵan.

Alasamyn!

Bıik meniń ne teńim,

Meniń sózim balapannyń byldyry.

Babalardyń armanynyń óteýin,

Syıdyrǵandaı júregińiz jyp-jyly.

Sóz ettińiz qudiretin Óleńniń,

Odan asqan jaýap joǵyn suraqqa.

Ózegine bitken gúldeı ónerdiń,

Tikenekti kórmedińiz biraq ta.

Kende emes em qasıetke óz basym,

Aqyn emes edim jáne taǵdyrsyz.

Jylasa da, kórsetpeıtin kóz jasyn,

Qaryndastyń kóz jasy da qadirsiz...

Qoǵam meni qospaıtynyn qatarǵa,

Uǵyp shyqtym Qudaı tutqan sizden de,

Eńbek etý netken arman Otanǵa,

Masyl bitken basyp qalǵan kezeńde.

Siz maqtaǵan ol óleńniń quny joq,

Sol keselden qutylatyn túrim joq,

Janym – jara,

Qanym – nala,

Aǵajan,

Aspanym – Ot,

Aqordam – Aq,

Týym – Kók!

Máńgi aıalap ótsem dep em Týymdy,

Bolsa dep em

Mártebeli

Máńgi el,

Kim qashyrǵan qadirimdi,

Qunymdy,

Kim jasyrǵan

Bult astyna kúnimdi?!

...Kim estıdi shyrqyraǵan

Únimdi?!

Aqsuńqar AQYNBABAQYZY