Ulttyq ekonomıka mınıstrliginde «2025 jyldaǵy men jáne meniń Qazaqstanym» taqyrybyndaǵy 5-9 synyp oqýshylary arasyndaǵy jalpyrespýblıkalyq esse-shyǵarma jazýdan jeńimpazdar marapattaldy, dep habarlaıdy Qamshy.kz aqparat agenttigi. QR Ulttyq ekonomıka mınıstri Tımýr Súleımenov aıtyp ótkendeı, shyǵarmalardyń qyzyqty úzindileri 2025 jylǵa deıingi Qazaqstan damýynyń Strategıalyq josparynda jarıalanady.

Konkýrsqa eldiń barlyq óńirlerinen qazaq, aǵylshyn jáne orys tilinde jazylǵan 100 esse kelip tústi. Nátıjesinde 27 ozyq jumys iriktelip alyndy. Sonymen birge mektep oqýshylary júldeli oryndarǵa ıe bolyp, Ulttyq ekonomıka mınıstrliginiń basshylyǵynan alǵys hattar men «EKSPO-2017» halyqaralyq kórmesin aralaýǵa bıletter aldy jáne dú Soleı Sırki kórinisin tamashalaıdy. Qalǵan 17 fınalǵa qatysýshy estelik gramotalarǵa ıe boldy.

«Neǵurlym qyzyqty shyǵarmalardan úzindiler Qazaqstannyń 2025 jylǵa deıingi Strategıalyq damý josparynda jarıalanady. Qazirgi ýaqytta sarapshylyq jáne bıznes-qoǵamdastyǵy ókilderin tartý arqyly atalǵan qujatty ázirleý júrgizilip jatyr», - dedi mınıstr.

Jeńimpazdardyń biri  elordalyq №82 «Daryn» lıseıiniń  9-synyp oqýshysy  Dana Ospanova esseni qalaı jazǵandyǵy týraly aıtyp, bolashaqta ne mazalaıtynyn baıandady.

« Men  «Men jáne meniń Qazaqstanym 2025 jyly» taqyrybynda esse jazdym. Óz shyǵarmamda men Qazaqstan týraly kózqarasymdy, oıymdy bildirdim. Ony jazbas buryn otbasymmen aqyldasyp,  ekologıa, medısına, bilim berý  syndy salalardy talqyladyq.  Bizde óz josparlarymyzdy júzege asyrýdyń múmkindigi mol. Máselen, ekologıany alatyn  bolsaq,  kún, jel  jáne uly dala bar, biz kún energıasyn, jel energıasyn qoldana alamyz», - dedi D.Ospanova.

Mektep oqýshylarynyń esse konkýrsy 2 kezeń boıynsha ótkizildi: óńirlik jáne respýblıkalyq. Ekinshi kezeńge ótken jumystardy arnaıy komısıa logıkalyq jáne kórkemdik paıymdaýy, baǵalaý jáne tujyrymynyń dáıektiligi, ıdeıalary men oıyn jetkizýdiń sonylyǵy, sezimdiligi men shynaıylyǵy, dáleldiligi men mazmundylyǵy sekildi ólshemder boıynsha baǵalady. Fınalǵa shyqqan oqýshylar óz jumystarynda tarıhı dálelderge jáne jeke dúnıetanymyna súıene otyryp, el damýyn ózinshe paıymdaýlarymen bólisti.