Ortalyq komýnıkasıalar qyzmetinde memlekettik bilim granttaryn berý jónindegi respýblıkalyq komısıa músheleri, QR Bilim jáne ǵylym mınıstrligi men ata-analar ókilderiniń qatysýymen baspasóz maslıhaty bolyp ótti dep habarlaıdy Qamshy.kz aqparat agenttigi.
QR BǴM Joǵary jáne joǵary oqý ornynan keıingi bilim departamentiniń dırektory Gúlzat Kóbenova memlekettik bilim granttary ıegerleriniń tizimi «Egemen Qazaqstan» jáne «Kazahstanskaıa pravda» gazetterinde jarıalanǵany týraly málimdedi.
«Bıylǵy bilim granttary talapkerlerdiń tańdaǵan mamandyqtaryna qoıylǵan talaptarǵa sáıkes tapsyrǵan testileý barysynda alǵan baldary boıynsha, sondaı-aq zańnamada bekitilip, jeńildik beretin aýyl kvotalary men basqa da kategorıalar boıynsha bólindi. Grant ıegerleriniń tolyqtyrylǵan tizimi «Altyn belgi» ıegerlerine beriletin basymdyq faktoryn eskerýsiz jasaldy.
13 tamyzda ótken Memlekettik bilim granttaryn berý jónindegi respýblıkalyq komısıanyń otyrysyna «Atameken» UKP, bilim salasy qyzmetkerleriniń kásipodaqtarynyń, JOO asosıasıasynyń, sondaı-aq ata-analar qaýymynyń ókilderi qatysty. Ulttyq testileý ortalyǵynda ata-analar ókilderi granttardy bóletin avtomattandyrylǵan júıe jumysymen tanystyryldy. Olar granttardy bólý prosesiniń ashyqtyǵyna jáne onda adamı faktordyń joqtyǵyna kózderin jetkizdi.
Alaıda, qoldanystaǵy zań talaptaryna sáıkes, «Altyn belgi» ıegerlerine bilim granttary tıesili bolǵandyqtan, respýblıkalyq komısıa bul sanattaǵy talapkerlerdi granttarmen ýnıversıtetterdiń, sondaı-aq bilim jáne ǵylym mınıstrligi men densaýlyq saqtaý mınıstrligi qarajattary esebinen qamtamasyz etiletindikteri jónindegi sheshimge keldi (bólek tizimmen gazetterdiń sońynda jarıalanyp otyr). Nátıjesinde granttar tizimi 3,5% nemese 1487 grantqa ulǵaıtylyp otyr. Bul – «Altyn belgi» ıegerleriniń bilim deńgeıiniń negizinen joǵary ekendiginiń taǵy bir kórsetkishi. Alaıda «Altyn belgi» ıegerleri grantsyz qaldyrylmaıdy.
Sonymen qatar BǴM zańnamany jetildirý jumystaryn jalǵastyrady. Biz aldaǵy jyldarda bilim granttarynyń tek testileý nátıjeleri men zańnyń aýyl kvotalary boıynsha, jetim balalarǵa, múgedekterge jáne basqa da jeńildik beriletin sanattaǵylarǵa bólinedi dep úmittenemiz.
Mınıstrlik aldaǵy aptadan bastap «Altyn belgi» ıelenip, UBT barysynda tómen nátıje kórsetken mektepterde tekserý jumystaryn júrgize bastaıdy. Bul tekseristerdiń nátıjesi túlekterge áseri bolmaıdy. Alaıda belgini taǵaıyndaý barysynda qujattardy burmalaý faktileri anyqtalǵan jaǵdaıda mektep basshylyǵyna qatań sharalar qoldanylady.
Memlekettik granttardy berý boıynsha suraq týyndaǵan jaǵdaıda Ulttyq testileý ortalyǵynda jumys jasap jatqan qoǵamdyq qabyldaý jáne «qaýyrt jeli» arqyly jaýap alýǵa bolady. Tolyq aqparat Ulttyq testileý ortalyǵynyń saıtynda www.testcenter.kz» dep málimdedi G. Kóbenova.
