QR Aýyl sharýashylyǵy mınıstrligi Astana bazaryndaǵy búlingen qarbyzǵa qatysty túsirilgen vıdeony zerttep shyqty. Belgili bolǵandaı, ónimdi ósimdik zıankesteri búldirgen, dep habarlaıdy Qamshy.kz  aqparat agenttigi QazAqparatqa silteme jasaı otyryp.

Osy oraıda Qazaqstannyń barlyq oblys ortalyqtaryndaǵy bazarlar karantındik qadaǵalaýǵa alynyp, qaýyn shybynynyń taralýyna jol bermeý sharalary iske asyrylýda.

«Bul karantındik qaýyn shybynyna qatysty bolyp otyr. Kóbinese osy zıankes baqsha daqyldaryn búldiredi, sonymen qatar ol elimizdiń ońtústik óńirlerinde jáne Ortalyq Azıanyń barlyq elderinde taralǵan. Ózderińiz bilesizder, jyl saıyn memleket tarapynan atalǵan zıankespen kúreske tıisti qarjy bólinedi»,-dedi QR ASHM Agroónerkisiptik keshendegi memlekettik ınspeksıa komıtetiniń tóraǵasy Erjan Aınabekov Úkimette ótken baspasóz máslıhatynda. Onyń atap ótýinshe, atalǵan fakti boıynsha bul qaterdi joıý aıasynda karantındik sharalar iske asyryldy.