17 tamyzda kórnekti ádebıettanýshy, baspager, aqyn Tálipbaı Qabaev ómirden ozdy. Bul týraly Fılolgıa ǵylymdarynyń doktory, profesor Dúken Másimhanuly óziniń Feısbýktegi paraqshasynda málim etti, dep habarlaıdy Qamshy.kz aqparat agenttigi.

«Úrimji qalasynan bozala tańmen birge jandy bozdatar qaraly habar jetti. Qazaq rýhanıaty aýyr qazaǵa ushyrady. 
Kórnekti ádebıettanýshy-ǵalym, áıgili baspager, Shynjańdaǵy qazaq rýhanıatynyń qatepti qara nary Tálipbaı Qabaev búgin (17.08.2017) tańerteń máńgiliktiń kemesine minip, baqılyq mekenine attanyp ketipti. 
T. Qabaev 1935 jyly QHR Tekes aýdanynda ómirge kelgen. 1957 jyly Shynjań ınstıtýtynyń (qazirgi Shynjań ýnıversıteti) fılologıa fakúltetin bitirgen. Ýnıversıtetti bitirgennen keıin joldamamen qazirgi Shynjań jastar-órender baspasyna redaktor bolyp jumysqa turady. Kúlli sanaly ǵumyryn qazaq baspasózine arnaǵan, "mádenı tóńkeris" jyldarynda "Tarym" lageriniń taqsiretin attaı jıyrma jyl tartqan ol, aqtalyp kelgennen keıin osy baspadan demalysqa shyqqan bolatyn. 
Marqumnyń otbasy, bala-shaǵasyna qaıǵylaryna ortaqtasyp kóńil aıtamyz! 
Aǵamyzdyń jany jánnatta, ımany joldas bolsyn!», - dep jazdy Másimhanuly.