Reseıdiń áskerı operasıasy barysynda osy aıdyń ishinde Sırıa aýmaǵynda bekingen 800 lańkestiń kózi joıylǵan dep habarlaıdy Qamshy.kz aqparat agenttigi sheteldik BAQ-qa silteme jasap.

Tek sońǵy 5 táýlik ishinde ǵana 819 áýe shabýyly jasalyp, «Irak pen Levant lańkestik tobyna» tıesili 40 tehnıka kúl-talqan boldy. Bul málimetti Reseıdiń Qorǵanys mınıstrliginiń ókilderi jarıa etip otyr. Negizi qazir Sırıa aýmaǵynda 3 qaýipsiz aımaq bar.

Reseılik áskerılerdiń aıtýynsha, Astana prosesi barysynda qol jetkizilgen kelisimder arqasynda bul elde gýmanıtarlyq apatqa jol berilmedi. Óıtkeni Birikken Ulttar Uıymy men Halyqaralyq Qyzyl kres komıteti osy qaýipsiz aımaqtarǵa 14 márte kómek jetkizgen. Al Reseıdiń júk tasymaldaıtyn ushaqtary bir aı ishinde sodyrlardyń qorshaýyndaǵy Deır-ez-Zor qalasyna shamamen 300 tonna azyq-túlik pen dári-dármek apara aldy. Áskerıler: «Dál osy shahar «Irak pen Levant lańkestik tobynan» azat etilse, atyshýly uıym jendetterine oısyrata soqqy berilýi tıis», – dep otyr.