Búgin «Nur Otan» partıasynyń Ortalyq apparatynda Elbasymyz Nursultan Nazarbaevtyń ómiri týraly «Qurysh tulǵa» atty jańa tarıhı-tanymdyq kitap kópshilikke tanystyryldy, dep jazady Qamshy.kz aqparat agenttigi.

Partıa bastamasymen jaryq kórgen týyndy Elbasynyń qaıratker retinde qalyptasqan Temirtaý, Qaraǵandy kezeńin qamtıdy. Kitap avtory – belgili pýblısıs, Qazaqstan Respýblıkasy Prezıdenti syılyǵynyń laýreaty, buǵan deıin «Elbasynyń altyn besigi» atty eńbegimen tanymal Aıtbaı Sáýlebek.

Avtor jańa týyndysynda sırek kezdesetin muraǵat qorlarynan alynyp, aqıqat-shyndyqqa negizdelgen tyń derekterdi, kýáger-tulǵalardyń júrekjardy sózderin, buryn jaryqqa shyqpaǵan túrli qujattardy usynady deıdi «Nur Otan» partıasynyń baspasóz qyzmeti. Kitap derektemelik negizde jazylǵan. Ol «Ot-ózen», «Bilim belesinde», «Ósý jolynda», «Órleý», «Shyńdalý», «Partkom hatshysy» jáne «Samǵaý» degen jeti bólimnen turady. Atalmysh ásem bezendirilgen eńbekte Elbasynyń sırek kezdesetin sýretteri de berilgen.

Kitaptyń alǵysózin «Nur Otan» partıasy Tóraǵasynyń birinshi orynbasary Muhtar Qul-Muhammed jazǵan. Elbasynyń Qazaqstan tarıhyndaǵy erekshe rólin aıshyqtap, táýelsiz elimiz qol jetkizgen tabystaryna tereń taldaý jasaǵan M.Qul-Muhammed alǵy sózin: «Elbasy ómiriniń ár kezeńin úlgi-ónege tutatyn qazaqstandyqtar bul kitapty qyzyǵa-qumarta oqıtyny anyq», – dep aıaqtaıdy.

«Qurysh tulǵany» jazý úshin avtor Máskeý, Omby, Almaty, Qaraǵandy, Temirtaý jáne Astana qalalaryndaǵy Elbasymen birge eńbek etken, oqyǵan áriptes-dostarymen kezdesken. Olardyń birqatary – Qabıdolla Sarekenov, Tóleýtaı Súleımenov, Qýanysh Omashev, Ermek Tóleýbaev, Toqtarhan Ysqaqov – is-sharaǵa qatysyp, jańa týyndynyń basty erekshelikteri men tarıhı qundylyǵy týraly aıtty. Sondaı-aq, olar kitaptyń qalyń oqyrman qaýymnyń kóńilinen shyǵatynyna senim bildirdi.