Elimizdegi jetekshi partıanyń qoldaýymen «Qazaq óneriniń antologıasy» jobasy aıasynda 7 tomdyq qazaq aıtysy kitabynyń tusaýy kesildi.
Qazaq ulttyq óner ýnıversıtetiniń Qorqyt atyndaǵy ǵylymı-zertteý ınstıtýty jaryqqa shyǵarǵan kitap «Kúltegin» baspasynda basylǵan. Ony M.Joldasbekov, S. Negımov, R.Álmuqanova syndy profesorlarmen birge Sh. Qoılybaev jáne A.Máýlet esimdi jas ǵalymdar daıyndaǵan.
«Jeti tomdyq jınaqtyń eń basty ereksheligi – qazaqtyń kóne aıtystary men búgingi aıtystaryn biriktirip berýi bolyp otyr. Kitapqa aqyndar týraly málimetter, túsindirme sózdikter jáne tuńǵysh ret sheteldegi qandastarymyzdyń aıtystary basyldy. Onyń ishinde «Qytaıdaǵy qazaq aqyndary» degen úlken bólim bar. Qazirgi kezde qytaıdaǵy qazaq aqyndarynyń erekshelikteri óte kóp. Óıtkeni olar áýelgi qalpyn saqtap, sózdi qýalap, ýájben aıtysady. Saıasattan tysqary jekpe-jekter ótkizedi. Sondyqtan kitapqa olardyń «Aıtys – sóz barymtasy» degen anyqtamaǵa jaýap beretin úlgilerin engizdik. Qazir qazaq aıtysynyń kemeline kelgen kezi. Aıtyskerlerdiń jańa tolqyny, jańa legi sońǵy 15-20 jyldyń kóleminde kórkem, ádemi aıtystar jasasa, sonyń báriniń mátinin qaǵazǵa túsirip, jınaqqa engizdik. Bul – «Babalar sózinen» keıingi halyqqa úlken serpilis beretin, lázzat tapqyzatyn óte qundy kitap» dedi jıynda aqyn Júrsin Erman. Al joba avtory, memleket jáne qoǵam qaıratkeri Myrzataı Joldasbekov aıtys mátinderi 1965-1966 jyldary akademık, jazýshy Muhtar Áýezovtiń alǵysózimen 3 tom, 1988 jyly jazýshy Sábıt Muqanovtyń alǵysózimen 2 tom bolyp shyqqanyn, keıin is jalǵasyn tappaı qalǵanyn tilge tıek etti. Sóz arasynda ol «Qazaq óneriniń antologıasy» jobasy 25 tom eńbekti quraıtynyn, qalǵan kóptomdyqtar aldaǵy ýaqytta jaryq kóretinin aıtty.
7 tomdyqtyń I-II tomdaryna Qaban jyraý men Janaq, Túbek, Súıinbaı, Abyl aqyndardan bastap Keńestik kezeńge deıingi tańdaýly 94 aıtys engen. III-IV tomdarda 1919-1991 jyldar aralyǵynda bolǵan aıtystar qamtylǵan. V-VI tomdarda 1991-2014 jyldar aralyǵyndaǵy 66 aıtys jaryq kórgen. VI tomǵa 2001-2014 jyldardaǵy eń úzdik 26 aıtys, al VII tomǵa Qytaı, Mońǵolıa, Ózbekstan memleketterinde turatyn qazaq aqyndarynyń sóz barymtasy berilgen.
"Aıqyn"
