Aıym Majakeevanyń eńbegi qazirgi jastar úshin úlgi-ónege deýge bolady. Ol bar bolǵany 23 jasta ǵana, biraq 3 toptyń múgedegi. Óziniń densaýlyǵyna qaramastan alǵa jyljyp, eńbekqorlyǵynyń arqasynda, ádemi, tamasha dúnıelerdi jasap shyǵarǵan. Syrt kózge onyń bala kezinde nevrologıalyq syrqatqa ushyraǵandyǵy tipti bilinbeıdi de, sebebi búginde qala turǵyndaryna sheber qoldyń ıesi retinde tanylýda. Onyń jasaǵan dúnıeleri árkimdi tańǵaltýda, máselen, Qytaıdan kelgen qazaq baýyrlar attaı qalap surap alǵan Astanadaǵy «Báıterek» monýmenti. Aıym qazirgi ýaqytta jeńil atletıkamen, sporttyń qystyq túrlerimen aınalysady.
- Anamnyń aıtýy boıynsha 1995 jyly 3 jarym jasymda mınıngıtpen aýryp 1 aı 17 kún komada, es-tússiz jatyppyn. Sodan uzaq jyldar aýyryp, emdelip júrdim, - deıdi Aıym, - densaýlyǵyma baılanysty qosalqy mektep ınternatqa bardym. Óz densaýlyǵymdy únemi emdep, sportpen shuǵyldanýmen boldym. Sonyń arqasynda Amerıkanyń Aıdaho shtaty, Boıse qalasynda uıymdastyrylǵan Dúnıe júzilik olımpıadaǵa shańǵy jarysyna qatysyp keldim. 1 qola jáne 1 kúmis alqa taqtym. 2008 jyly Respýblıkalyq «Special Olympics» uıymdastyrǵan Almaty qalasynda mını fýtbolǵa qatysyp komandalyq III oryn aldym. Qazan aıynda qalalyq múmkindigi shekteýli jandar arasynda ótkizilgen «Kúz arýy -2011» baıqaýynda bas júldeni jeńip aldym. Bos ýaqytymda keste tigemin, bıser jasaımyn, jumsaq oıynshyqtar tigemin. Qazirgi kezde Semeı qalasyndaǵy kásiptik №1 lıseıdiń shashtaraz bólimin oqyp bitirdim. Óskemen qalasynda ótken «Bárimiz birdeımiz, kemsitýdi bilmeımiz» atty múgedek jandarǵa arnalǵan festıválge qatysyp maqtaý qaǵaz ben baǵaly syılyqqa ıe boldym. Semeı qalasynda ótkizilgen «Kún álemi» atty festıválge qatysyp birinshi oryn aldym. Densaýlyǵymnyń syrqatyna qaramaı, salaýatty ómir saltyn ustanamyn. Kóptegen is sharalarǵa qatysa otyryp, jaqsy adamdardyń kómegin kórdim. Tapsyrystar óte kóp, bos ýaqytym joq deýge bolady.
Aıym kúlimdegen, ashyq kóńil, ádemi qyz. Tek syrqaty ǵana ara-tura syr berip qalsa, ol ony elemeýge tyrysady. Oǵan dem beretin jumysy. Atap aıtqanda bıserden túrli dúnıeler, qazaqsha toıbastar, syı-káde, monshaqtar jasap shyǵarý súıikti isi. Bıserdi qazaqsha jasandy injý-marjan dep ataıdy, sebebi naǵyz injý-marjan teńizdiń túbinde jatady. Bul kúnderi kóptegen sheberler qoldanatyn injý-marjandar plasmassa, shyny, aǵash, metaldan da alynady. Óz densaýlyǵyna oraı Aıym arnaıy ınternatta tálim alyp, onda jasandy injý-marjandy tizbektep, ártúrli nárse jasaýdan habardar bolady. Keste tigip úırenedi. Osynyń bári onyń sheberligi shyńdala túsýine yqpal etken. 2014 jyly mamyr aıynda «Damý» kásipkerler uıymdastyrý qorynyń jobasyna qatysyp «Qus joly» , «Juldyzdarǵa qara» jobasyn jeńip alǵan jas kásipker retinde tanyldy. Grant esebinen oǵan tigin mashınasy men 120 metr qajetti bul berildi. Patent alǵan Aıym Majakeeva qazirgi kezde ózi úıinen bıznes ashyp, turmystyq zattar men tósek jabdyqtaryn tigip jatyr. Ol eńbekqor bolǵany sonshalyq, jetistikteri de ár saladan, atap aıtqanda, «Sóz mergen» saıysynda III oryn alsa, «Týǵan tilge taǵzym» atty sharaǵa qatysyp qol óner saıysynda birinshi oryndy ıemdengen. Sondaı-aq, múmkindigi shekteýli jandar arasyndaǵy qalalyq shahmat saıysynda III orynǵa ıe bolǵany taǵy bar.
Raýshan Qabjanyzy. Semeı
