Elbasy Nursultan Ábishuly Nazarbaev Qazaqstan halqyna bıylǵy Joldaýynda «Otandy súıý – babalardan mıras bolǵan uly murany qadirleý, ony kózdiń qarashyǵyndaı saqtaý, óz úlesińdi qosyp, damytý jáne keıingi urpaqqa amanat etip, tabystaý degen sóz. Barsha qazaqstandyqtardyń jumysynyń túpki máni – osy!», - dep Qazaqstandyq patrıotızmniń jańa úlgisin aıqyndap bergen bolatyn.
Prezıdent Joldaýyndaǵy strategıalyq maqsat-mindetterdi nasıhattaý sharalary aıasynda Almaty tehnologıalyq ýnıversıtetinde Qazaqstan Respýblıkasynyń Táýelsizdik kúnine arnalǵan «Men ATÝ patrıotymyn» atty patrıottyq shara ótti.
Sharany saltanatty túrde ashqan ýnıversıtettiń birinshi prorektory, profesor Baýyrjan Nurahmetov: «Táýelsizdikke qol jetkizý – irgesi qalanǵan árbir memlekettiń armany. Qazirgi tańda ashyq aspan astynda beıbit kún keship jatqan Sizder men bizder, árıne, baqyttymyz. Bul ata-babamyzdyń batyrlyǵy men qaısarlyǵynyń, óz eline patrıottyq seziminiń myqtylyǵynyń arqasy. Sonymen qatar, Ult kóshbasshysy, Qazaqstan Respýblıkasynyń Prezıdenti Nursultan Ábishuly Nazarbaevtyń salıqaly saıasatynyń, kóregendiliginiń arqasy ekenin bilemiz», - dep atap ótti.
Búgingi táýelsizdigimizge qol jetkizý jolynda 1986 jylǵy Jeltoqsan kóterilisiniń tarıhı mańyzy zor. Sharanyń qonaqtary, Jeltoqsan kóterilisine qatysýshylar – Qazaqstan Jazýshylar odaǵynyń múshesi, aqyn-sazger Amanǵazy Káripjanov pen Qazaqstannyń mádenıet qaıratkeri, aqyn Bolat Sharahymbaı Jeltoqsan kóterilisi men Táýelsizdik taqyrybynda jastarmen oı bólisti. Bolat Sharahymbaı: «Biz Jeltoqsan kóterilisiniń kýágeri ǵana emes, sol oqıǵaǵa basynan aıaǵyna deıin qatysyp, el táýelsizdigi úshin kúrestik. Atap ketý kerek, bul kóterilistiń tarıhı mańyzy zor. Sebebi sol oqıǵalardan keıin halqymyzdyń táýelsizdik rýhy kúsheıdi, sol kezdegi Keńester Odaǵynyń basqa aımaqtarynda demokratıalyq jańarý prosesteri bastaldy, birtindep KSRO ydyrap, Qazaqstan óz egemendigin aldy», - dep atap kórsetti.
Táýelsizdiktiń mereıin asqaqtatyp, stýdent jastardyń el erteńine degen jaýapkershiligin arttyrýda ýnıversıtettiń ulaǵatty oqytýshy qaýymynyń úlesi zor. Ýnıversıtet basshylyǵy atynan birinshi prorektor Baýyrjan Nurahmetov bilimdi urpaq tárbıeleýde erekshe eńbek sińirgen ustazdarǵa alǵysyn bildirip, arnaıy syıaqymen marapattady. «Sizderdiń eńbekterińizdiń arqasynda tálimgerlerimiz bilim men ǵylym salasyndaǵy jetistikterimen týǵan elge degen súıispenshiligin dáleldep keledi» – dedi ol.
Shara aıasynda Almaty tehnologıalyq ýnıversıtetindegi «NurOtan» bastaýysh partıa uıymynyń elýden astam qyzmetkerine jańa úlgidegi partıalyq bıletter tabys etildi. Saltanatty túrde partıalyq bıletterdi tabystaǵan «NurOtan» partıasynyń Almaly aýdandyq fılıaly Saıası keńesiniń múshesi, ýnıversıtettiń tárbıe isi jónindegi prorektory Qaltaı Batholdın «NurOtan» partıasynyń tóraǵasy, Ult kóshbasshysy Nursultan Ábishuly Nazarbaevtyń salıqaly saıasatyna árdaıym qoldaý kórsetip, Otanǵa degen sheksiz súıispenshiligimizdi ispen dáleldep, onyń kórkeıýi jolynda judyryqtaı jumylyp jumys isteýge shaqyrdy.
Merkelik shara aıasynda ýnıversıtet jastary arasynda baıqaý uıymdastyrylyp, stýdent-jastar óz ónerlerimen otansúıgishtiktiń jarqyn úlgisin kórsetti.
«Qazaqstan Respýblıkasynyń Tuńǵysh Prezıdenti jáne Táýelsizdik» taqyrybynda stýdentterdiń komandalary arasynda breın-rıng uıymdastyrylyp, jastar ózderiniń tereń bilimderin jan-jaqty kórsete bildi.
«Men ATÝ patrıotymyn» saıysynyń úzdikteri anyqtalyp, «Sóz sheberi», «Eń úzdik patrıottyq án», «Eń úzdik mátin», «Eń úzdik daýys», «Eń úzdik áleýmettik beınerolık» nomınasıalary boıynsha ónerlerin kórsetken stýdentter arnaıy dıplomdarmen marapattaldy.
Almaty tehnologıalyq ýnıversıtetiniń
aqparattyq qyzmet jetekshisi
Asqat Ábishev
