Bir kúni muǵalim synypta otyrǵan balalarǵa: − Senderdiń jek kóretin adamdaryń bar ma? − degen suraq qoıady. 
Oqýshylar oılanyp qaldy. Keıbireýi únsiz qalyp, keıbiri qabaqtary túıile bastaryn ızedi. 
Olardyń árqaısysyna birden qaǵaz qalta taratqan muǵalim: − Biz bir qyzyq oıyn oınaıyq, − dedi.

− Ótken bir jeti ishinde kim sizdi renjitti, túgeldeı eske túsirińiz. Sosyn ol balanyń aty men istegen isin tildeı qaǵazǵa jazyńyz. Mektepten qaıtqan soń ózen jaǵasyna baryp, túrli salmaqtaǵy tastardan terip alyp, álgi jazýy bar qaǵazdy soǵan japsyryńyz. Júregińizdi aýyrtqan isi aýyr bolsa, tas ta úlken bolsyn, kishkene bolsa, tas ta kishkene bolsyn. Sońynan tastyń bárin ózderińmen birge alyp barǵan qaltaǵa salyp maǵan ákelip kórsetińder. 
Bul tapsyrma balalarǵa óte qyzyqty boldy. Sabaqtan qaıtqan soń barlyǵy ózen boıyna baryp, tas teredi. Ertesi tańerteń tastaryn kóterip mektepke kelgen olar bul is jóninde qyzý áńgimege kirisedi. Arada bir kún ótedi. Ertesi taǵy bir kún ótedi. Úshinshi kún jyljıdy. Keıbir oqýshylardyń dorbasy tasqa tolyp, tipti kótere almaýǵa aınalady. 
Aqyry bir kúni oqýshylar bul iske qarsy shyǵyp, bas tartady. − Muǵalim, tapsyrmańyz tym qıyn eken! − deıdi olar renjip. − Onda qoldaryńdaǵy basqalardyń  qylyǵyn kórsetetin tastardy tastańdar! − deıdi muǵalim jymıyp. − Bosqa bireýdiń kemshiligin "qymbat zat" kórip, júrekke júk qylyp arqalap júrgenshe, ony keshire bilýdi úırenińder. Sebebi ýaqyt óte kele kim bolsa da bul aýyrlyqqa tóze almaıdy. Keshirimdilik − shattyqqa bastar jol. Keshire biletin adam adamgershiligi mol adam qataryna jatady, − deıdi.