Sary tústi saǵynyshtan Kúz monshaq,
Taǵyp alyp taǵy keldi bizdi ańsap.
...Kózderińdi turdy menen jasyryp,
Kirpikteriń qyzǵanshaq.
Sur qalaǵa syr aıtady syńsyp Kúz,
Al, ekeýmiz kúzde ashylǵan búrshikpiz.
Kirpikteriń kúni-túni kúzetken,
Kózińdegi sezim be edi kirshiksiz?!
Sezim eken saqtaǵany sol kózdiń,
Kıalǵa erip bir álemdi men kezdim.
Kúnniń álsiz sáýlesine jylynyp,
Kóz ishinde keriledi kerbez – muń.
Jasyl baqtyń japyraǵyn urlap Kúz,
Jatyr áne. Sirá bizder tym jatpyz?
Kóshe boılap kele jattyq syrlasyp,
Únsizdiktiń ún taspasyn tyńdap biz.
Emis-emis qos júrektiń dúrsili,
Estiledi, bul – mahabbat tylsymy.
Óziń jaıly oılarymdy urlaıdy,
Kúzgi jańbyr. Tamshylardyń tyrsyly.
Qalqaman Sarın
Pikir qaldyrý