Saýl "Kanelo" Alvarestiń (49-1-2, 34 KO) jumystarymen aınalysatyn Golden Boy Promotions kompanıasynyń negizin qalaýshy Oskar De La Hoııa meksıkalyq boksshynyń orta salmaqtaǵy WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkınmen (37-0-1, 33 KO) ekinshi kezdesýdiń kelissózderi qalaı ótip jatqanyn aıtty. Bul týraly BoxingInsider.com portaly málimdedi. 

Onyń aıtýynsha, eki boksshy arasyndaǵy ekinshi kezdesýdi uıymdastyrý týraly kelissózder keler jyldyń basynda bastalady eken. Sonymen qatar De La Hoııa jekpe-jektiń qashan ótetinin de aıtty, dep jazady Vesti.kz saıty. 

"Eki boksshy da bul jekpe-jekti uıymdastyrǵysy keledi. "Kanelo" da Golovkın de birinshi kezdesýinde ózderiniń barlyq múmkindikterin tolyq kórsete almady. Kezdesý Meksıkalyq ulttyq meıramy Sınko de Maıa kúni ótýi múmkin. Nemese qyrkúıek aıynda. "Kanelo" maǵan kezdesýdi ótkizýge yńǵaıly kún men jerdi tabýdy tapsyrdy", - deıdi De La Hoııa. 

Aıta keteıik, buǵan deıin Golovkın men "Kanelo" arasyndaǵy ekinshi kezdesýdiń 2018 jyldyń 5 mamyrynda, Sınko de Maıo merekesi (1862 jyly 5 mamyrda meksıkalyqtardyń Pýebla túbeginde jeńisine oraı belgilengen mereke) kúni ótýi yqtımal ekeni belgili boldy. 

Biraq GBP promoýterlik kompanıasynyń prezıdenti Erık Gomes kezdesýdiń odan erte ótýi yqtımal ekenin de aıtty. 

Eske salaıyq, qazaqstandyq boksshy men meksıkalyq boksshy arasyndaǵy birinshi kezdesýin 16 qyrkúıek kúni Las-Vegasta ótip, teń aıaqtalǵan edi. Osylaısha qazaqstandyq boksshy ózine tıesili barlyq belbeýlerin qorǵap qaldy.