Jańa otbasyn quryp, aq nekesin qıyp jatqan jastarǵa neke týraly birneshe nusqaýlyq usynǵymyz keledi. Óıtkeni neke – kóringenniń qolynda oıynshyq bolatyn ermek emes. Nekeniń de óz serti, óz zańy bar. Sonymen neke degen ne? 
Neke – qyz ben jigittiń mahabbatynyń jeńisi. Sezim men senimniń jemisi pisken tusta ol nekege kelip ulasady. Nekege otyryp, jubaılyq ómirin qurmettegen erli-zaıyptylar jamandyq ataýlydan árqashan alshaq bolady. 
Neke – eń tátti sezimderdiń toǵysy. Birin-biri súıgen eki jastyń ekeýi eki baǵytqa emes, birlesip bir baǵytqa qaraýynan artyq jarasymdylyq joq. 
Neke – jańa ómirdiń bastaýy, jaman qylyqtyń toqtamy. Tentektik pen bosbelbeýlik, erkelik pen jaýapsyzdyqtan qutylatyn shaq. 
Neke – ózgege kóz salý men sóz salýdy toqtatý. Myń adamnyń ishinen tańdap alǵan jartyńdy qalǵan ómirińniń sońyna deıin baqytty qylýǵa tyrysasyń. Neke úshinshi adamǵa qarsy. Úshinshi bireý nekege kılikken kezde urys-keris bastalady. Urys-keris pen qyzǵanyshtyń sońy ajyrasýǵa kelip tireledi. Áıtkenmen nekeniń maqsaty – ajyrasý emes, ómirlik birge bolý. 
Neke – óz qamyńdy ǵana oılap, ózimshildikke salynýdy doǵarý. Neke eki adamnyń bastamasymen qurylady. Alǵashynda ekeý, sosyn kishkentaılar kóbeıedi. «Men» sózi «bizge» aýysyp endigi jerde tek otasynyń qamyn ǵana oılaý kerek bolady. Óz jaǵdaıyńdy ǵana oılap, ózińe ǵana ǵashyq kúnderińmen qoshtasqanyń abzal. 
Neke – áldekimge kerek ekenińdi seziný. Endi sen aq nekeń úshin, adal jaryń úshin jáne bolashaq kishkentaı júrek ıeleri úshin kereksiń. Óziń úshin ǵana ómir súrýdi toqtatyp, ózgelerdi óz ómirińe arlastyr. Olarmen tyǵyz qarym-qatynasta bolyp, olarǵa úıren. 
Neke – jaýaptylyqty seziný. Endi sen ózińniń zańdy nekeń úshin, qarym-qatynasyń men jaryń úshin jaýaptysyń. Óz jaýapkershiligińdi sezine bil.