Qazaqstannyń syrtqy ister mınıstri Qaırat Ábdirahmanov Qytaıda qıyndyqqa tap bolǵan qazaqtardyń máselesi qalaı sheshilip jatqanyn aıtty, dep habarlaıdy Qamshy.kz aqparat agenttigi Sputnik Qazaqstanǵa silteme jasap. 

23 maýsymda Astanada ótken Dúnıejúzi qazaqtarynyń V quryltaıynda Germanıadan kelgen qazaq Elbasyǵa Qytaı úkimetiniń ondaǵy qazaqtarǵa qysym kórsetip, qandastarymyzdyń quqyqtaryn taptap jatqanyn jetkizgen bolatyn. Nursultan Nazarbaev bul jaǵdaıdan habarsyz ekenin aıtyp, Syrtqy ister mınıstrligine máseleniń anyq-qanyǵyn anyqtaýdy tapsyrǵan edi. 

"Jýyrda ótken qazaqtardyń quryltaıynda Elbasy Nursultan Nazarbaev syrtqy ister mınıstrligine, basqa tıisti vedomstvolarǵa máselele kóterilse, ony egjeı-tegjeı eki jaqty qarastyrý jóninde naqty tapsyrma berdi. Osy tapsyrmany oryndaý barysynda bizge resmı túrde málimet tússe, mindetti túrde Qytaı tarapymen, olardyń syrtqy ister mınıstrligi, basqa da mekemelerdegi áriptesterimizben máseleni kóteremiz. Qazaq dıasporasynyń sheteldegi múddeleri men quqyqtaryn qorǵaý — bul bizdiń tikeleı mindetimiz", — dedi búgin syrtqy ister mınıstri Qaırat Ábdirahmanov tilshilerdiń suraǵyna bergen jaýabynda. 

Ol Qytaımen resmı úkimetaralyq deńgeıde qarqyndy dıalog ornaǵanyn atap ótti. Aıtýynsha, eki jaqty kelissózder barysynda barlyq máseleler talqylanady. 

"Quryltaı qorytyndysy boıynsha Qytaıdaǵy qazaqtar, onyń ishinde Shyńjań-uıǵyr avtonomıalyq aýdanynda resmı qujattar alý, shekarany kesip ótý úshin qolǵa tólqujat alý boıynsha qıyndyqtar kórip otyrǵanyn anyqtadyq. Qytaıda memlekettik qyzmettegi qazaqtar tólqujat ala almaı qınalyp júr. Osy máselelerdiń bárin egjeı-tegjeı zerdelep, saralap, qytaılyq áriptesterimizben talqylap jatyrmyz", — dep málim etti mınıstr.  

Mınıstr eki jaqty kelissózderdiń kún tártibin tolyq asha almaıtynyn aıtty.