Aıdos pen Aqerke qyz ben jigit bolyp júrgenderine biraz jyl boldy. Ekeýi jaıly tanystary kórgen saıyn  «jarasymdy jup», «qos ǵashyq» degen sózdermen olardyń sezimin odan ári ushtastyratyn.

        Aqerke bıyl 18 jasqa tolatyn boıjetken. Bolashaq mamandyǵy horeograf. Úıi oqıtyn jerinen alys bolǵandyqtan, jataqhanaǵa ornalasqan. Ata-anasy kóz aldynda emes, bir sózben aıtqanda óz ómiri óz qolynda. Al, Aıdos bolsa joǵarǵy oqý ornyn támamadaǵan muǵalim. Jasy jıyrma tórt shamasyndaǵy seri jigit páter jaldap turady. Aqerke birde jataqhanany túnese birde Aıdostyń páterin panalaıdy. Ekeýi erli-zaıypty otbasy retinde ómir súrdi. Basynda ózderiniń qandaı qatelikke boı aldyryp júrgenderin sezbedi. Olar úshin árbir tań qýanyshpen atty. Bir-birine degen sezim odan ári órshidi. Ekeýi úshin bul kúnder máńgi jasaıtyndaı kórindi...

      Birde Aqerke sabaq ústinde basy aınalyp, jedel járdemmen aýdandyq aýrýhanaǵa jetkiziledi. Dáriger aıaǵynyń aýyr ekenin, jaqynda náresteli bolatynyn aıtty. Ómirinde estimegen jańalyqqa boıjetken ne jylaryn, ne kúlerin bilmeı siresip qalady. Bul jańalyq Aıdostyń minezin ózgertip jiberedi. Jaýapkershilik, istegen isin moınymen kótergisi kelmegendikten Aqerkeni qalalyq aýrýhanaǵa jetkizedi.

       «Áli ekeýimiz jaspyz. Basymyzda baspanada joq. Sen oqýyńdy bitirgen joqsyń. Ata- anamyzǵa da aıtqan uıat. Odansha balany aldyraıyq» degen oı tastaıdy Aıdos aqylgóısip Aqerkege. Sodan eki oıly Aqerke ÝZI-ge túsedi. «Balanyń júrek soǵysy jaqsy, qozǵalýy, damýy qalypty. Náresteniń jynysy – ul. Merzimi 18 apta. Jasandy túsik jasaýǵa kelmeıdi. Ózmizdiń dárilerimiz bar. Bosaný nátıjesi arqyly balańyzdy alamyz. İsteıtin jumysymen alatyn dárilerdi eseptegende 45 myń teńge qarajat ketetinin» dáriger eki jasqa jetkizdi. Aıdos tezdetip baladan qutylýdy oılaý barysynda, dostarynan aqsha surap dárigerge usynady.

        Sóıtip, sap-saý balany 45 myń teńge arqyly bul dúnıeden joq qylady. Aqerkeniń boıynda eshqandaı aqaý bolmaǵandyqtan, aýrýhanadan shyǵarady. Qolynda júrek soǵysy joq náreste, esten ketpeıtin qatelik, qolynan túk kelmeıtin qorqaq Aıdospen kólikke otyryp, zırat basyna jol tartty.  Bul oqıǵadan keıin Aqerke men Aıdos ekeýiniń aralary sýyp ketti.

      Aıdos jaýapkershilikti sezine almaıtyn, dúnıeni oılatyn jigitter qatarynan tabyldy. Osyndaı er adamdar qoǵamnyń buzylýyna úlken úles qosýda. Qansha qatelikti jiberse de, uıatty bolǵan qyzdyń bolashaǵynda qaıtadan ana bolý baqyty jazyla ma, belgisiz...

Ardagúl Áskerbek