Tunshyqtyryp tirligimdi tynymsyz, 
Tas tóbemnen tóndi taǵy Tún únsiz. 
Maǵan qarap muńaıady myń juldyz, 
Jetimsirep meniń móldir muńymsyz. 

Meniń muńym, meniń muńym – móldir muń, 
(Muńsyz ómir súre almaımyn men bir kún). 
Túngi aspannan tunyq izdep kóz almaı, 
Qarap jatyp qansha juldyz sóndirdim. 

Búgin taǵy qurban bolyp bar úmit, 
Sanadan tys qudiretke baǵynyp. 
Myń juldyzdyń arasynan bir juldyz, 
Aǵyp tústi. Jalǵyzdyqtan jalyǵyp. 

Olar, sirá, ǵashyq meniń muńyma, 
Men de olardyń qumar edim syryna. 
Muńsyz – minsiz ǵumyr keshý, qudaı-aý, 
Qasiret qoı jerdiń Aqyn ulyna. 

Áppaq Aıdyń bir sáýlesi tıse artyq, 
Keter, shirkin, kóńilimde kúı shalqyp. 
Ózgeshe bir óleń jazyp otyram, 
Myń juldyzdan muńdarymnyń ıisi ańqyp. 

Meniń muńym sáýle tógip Kúnge uqsap, 
Muńly shaqqa syılaıdy bir nurly sát. 
Túngi yzǵardan tońyp turǵan tomsaryp, 
Juldyzdardan gúl jasaıdy bir qushaq. 

Aspanymda – tunyp turǵan kúmis shyq, 
Aspan asty – syr uqtyrǵan tynyshtyq.
...Ózim súıip, ózim kúıip jatatyn, 
Meniń muńym yp-ystyq.

Qalqaman SARIN