Halyqaralyq kórme ótkizgen qalanyń turǵyny kıiz úıde turyp jatyr

/uploads/thumbnail/20171112145508072_small.jpg

Elordalyq kolejdiń stýdentteri sý tasqynynan zardap shekken otbasyǵa kómektesý úshin japsyrma men shokolad satyp júr, — dep habarlaıdy Qamshy.kz aqparat agenttigi Sputnik Qazaqstan saıtyna silteme jasaı otyryp.

Kolej stýdentteri Astanada baspanasyz qalǵan otbasyǵa úı salýǵa qarjy jınap jatyr.

"MeyrimdiAsyladam" qaıyrymdylyq qorynyń eriktileri qurylys brıgadasymen esep aıyrysý úshin ótken-ketken adamdarǵa "Shıpy" japsyrmasyn satýda.

"Biz japsyrmalar men bilezikterdi, ár túrli shokoladtardy aıtarlyqtaı joǵary baǵada – myń teńgeden satyp jatyrmyz. Alaıda eger bul aqshanyń qaıda ketip jatqanyna qarasańyz, bul anaý aıtqandaı kóp soma emes. Biz Astanadaǵy Qyrqynshy stansada kıiz úıde turyp jatqan otbasyǵa kómekteskimiz keledi. Qajetti somany jınaýǵa eki kún ýaqytymyz qaldy. Alty kúnniń ishinde 470 myń teńge jınadyq, al keregi – 500 myń", — dedi qordyń eriktisi Qylymbek Atageldıev.

Qylymbektiń aıtýynsha, ol qor týraly EKSPO kórmesinde erikti retinde jumys istep júrgende bilgen. Elordadaǵy qoǵamdyq tamaqtaný jáne servıs kolejiniń stýdenti sabaqtan bos ýaqytynda qaıyrymdylyqpen aınalysýǵa sheshim qabyldapty.

"Muqtaj adamǵa kómekteskim kelip júretin. Bireýge qol ushyńdy berseń, lázzat alasyń. Bizdiń qorda shot ashylǵan, turaqty túrde esep berip turamyz. Eger keńsege 75 myń teńge alyp barsaq, ol dereý qurylys brıgadasynyń kartochkasyna aýdarylady", — dep túsindirdi Qylymbek.

Qordyń eriktileri japsyrmalardy qalanyń ár túrli bóliginde, ádette saýda-oıyn-saýyq ortalyqtarynyń janynda satady.

"Jalpy bul jumysta eriktilerge aqsha tólenedi. 12 japsyrma satsań, eki myń teńge alasyń. Alaıda biz tegin jumys istep jatyrmyz. Úıde kompúterdiń aldynda otyrǵansha, adamdarǵa kómektesken durys dep oılaımyn. Oqýǵa kedergi keltirmeıdi", — dedi sóz sońynda Qylymbek Atageldıev.

Qazirgi tańda eriktiler sý tasqynynan keıin baspanasyz qalyp, kıiz úıde turyp jatqan Raýshan Imanǵalıevaǵa kómektesý úshin qarjy jınap jatyr.