DAISH terorıstik toby turǵyndarǵa qatysty qandaı qatigez áreketterdi qoldanatyny belgisiz. Sırıada reportaj jasaý óte qaýipti. Sondyqtan jýrnalıser DAISH basyp alǵan jerlerge kóp bara bermeıdi.  Alaıda óz ómirin qaterge tigip Sırıadaǵy jaǵdaı týraly aqparatty jýrnalıserge jetkizip otyrǵan turǵyndar bar. Bı-bı-sı korespondenti sońǵy úsh aıda Rakka turǵynymen habarlasyp turdy. Ol kúndelik jazady. Onda DAISH sodyrlary basyp alǵan qaladaǵy turǵyndardyń jaǵdaıy baıandalady.

Buǵan deıin kýáger kúndeliginiń 1-shi, 2-shi, 3-shi, 4-shi bólimin jarıaladyq

Kýáger kúndeligi (5-shi bólim):

Dalady kún jarqyrap turdy. Mundaı aýa raıy maǵan kúsh bergendeı boldy, biraq saýda júrmedi. Taýardy DAISH-tyń birneshe tekserý oryndaryn ótkizý úshin qyrýar qarajat ketetin. Sondyqtan taýar baǵasyn kóterýge týra keletin. Alaıda saýdanyń júrmeýi tek qymbatshylyqqa ǵana baılanysty emes. Adamdar úıinen shyqpaıtyn boldy.

DAISH dúken ıelerine salyq salady. Sonymen qatar, toq pen dúkendi jýyp, tazalaıtyn adamǵa da aılyǵyn berýimiz kerek. Osynyń nátıjesinde, biz shyǵynǵa battyq.

Dúkenge dosymnyń anasy kirip keldi. Óńi qashyp ketken. Áldenege qatty alańdap turǵany kórinip turdy.

Dosymmen narazylyq bildirý tobynda tanysqanbyz. Dosym eldiń saıası ómirine aralasýyn toqtatyp, úılenip, tynysh ómir bastaǵan.

Dosymnyń anasy DAISH sodyrlarynyń úıge kelip balasyn tutqyndaǵanyn aıtty. Men ony tynyshtandyrýǵa tyrystym. Dosymdy buǵan deıin de birneshe márte tutqyndap, qaıta jibergen edi. Osy joly da solaı bolady dedim. Biraq ony sendire almaǵan sekildimin.

Ol meni de tutqyndamaı turǵanda qaladan ketýim kerek ekenin aıtty. Onyń sózi meni ábigerge túsirdi.

Birneshe kún ótti. Men dúkendegi sórelerge taýardy qoıyp jatqanda dosym kirip keldi. Ol maǵan búgin úıge basqa jolmen barýymdy surady. Sebebi jaman nárse kórýim múmkin ekenin aıtty. Biraq ne ekenin aıtpady.

Men sol kúni úıge burynǵy jolymmen qaıttym. Kóshede ne kórýim múmkin ekeni meni qatty qyzyqtyrdy. Dosym turatyn úıdiń janynan basy joq deneni kórdim. Denesinde «Shpıon jáne Islam memleketine qarsy shyqqan adam» dep jazylǵan.

Muny kórgennen keıin úıge bara almaımyn. Anamnyń meni mundaı kúıde kórgenin qalamaımyn.

Dosymnyń denesin dál úıiniń aldyna, anasynyń, jaqyndarynyń kóz aldyna ilip qoıǵany naǵyz qatigezdik. Men buǵan shydaı almaımyn.

Kún ótken saıyn jaǵdaı nasharlap barady. DAISH sodyrlary revolúsıaǵa qatysy bar kez kelgen adamdy tutqyndady. Tipti ol adam revolúsıaǵa birneshe aı tipti birneshe jyl buryn qatyssa da olardy qýdalaýyn toqtatpady. Men de revolúsıaǵa qatysqan adamdardyń birimin. Narazylyq aksıasyna qatysqandardyń barlyǵymen baılanysty úzgenmin. Biraq bul jetkiliksiz. Men ketemin dep sheshtim.