Samarqan oblysynda kolej jáne mekteptiń joǵary synybynda oqıtyn oqýshy qyzdardyń bárin gınekologqa tekserýge jiberip jatyr dep habarlaıdy Qamshy.kz aqparat agenttigi centralasian.org saıtyna silteme jasaı otyryp. Derekkózdiń málimetinshe, ondaǵy maqsat - tósek qatynasyn erte bastaǵan jasóspirimderdi anyqtaý.
Samarqan oblysy ákimshiligindegi derekkózdiń habarlaýynsha, oqýshy qyzdardy tekserý arqyly erte júktilikti anyqtamaq jáne ózderine qol jumsaý oqıǵasynyń aldyn almaq. Jynystyq qatynasty erte bastaǵan oqýshylarmen psıhologtar jumys isteıtin bolady deıdi.
Alaıda oqýshylar ózderin májbúrli túrde dárigerge qaratýyna qarsy. Biraq tekserýden keıin kolejde oqıtyn bir jasóspirimniń júkti ekeni anyqtalǵan.
Jappaı tekserý Ózbekstan prezıdenti Shavkat Mırzıaevtiń Samarqanda sóılegen sózderinen keıin bastalǵan.
9 qarashada memleket basshysy Samarqan oblysy halyq depýtattarynyń keńesinde áıelder arasynda ózine qol jumsaý dáıegi kóbeıip bara jatqanyna alańdaǵan. Mırzıaev sońǵy ýaqytta bir Samarqan oblysynda 145 qyz-kelinshektiń ózine qol jumsaǵanyn aıtqan.
