Ertede bir bala alma aǵashymen aıyrylmastaı dos bolypty. Olar kúnuzaq birge bolyp, kúnderin ylǵıda birge ótkizedi eken. Bala sharshasa onyń tasasyn panalaıdy, qarny ashsa jemisin jeıdi, ishi pysqanda onyń ústine órmelep oınaıdy eken. Osylaı kúnder zyrǵyp, jyldar jyljyp óte beredi. Álgi bala eseıip,er jetip óz ortasyn taýyp, úılenip óz teńin tabady. Onyń bala kezdegi alma aǵashyna baratyn ýaqyty da bolmaıdy. Al, alma aǵashy balany qatty saǵynady. Ýaqyt jyljyp, kúnderdiń bir kúninde bala alma aǵashyna keledi. Alma aǵashy qatty qýanyp:

— Kel baıaǵy kúnderdegideı oınaıyq,minekeı, meniń jemisim de je, — deıdi. Bala:
— Qandaı oıyn, men oınaıtyn jastan óttim. Qazir men úılendim. Maǵan seniń jemisiń kerek emes, sen maǵan aqsha bershi, — deıdi. Alma aǵashy:
— Mendegi qandaı aqsha, odanda sen meniń jemisimdi terip alyp, ony satyp aqsha qyl, — deıdi. Bala aǵashtyń barlyq jemisin terip alyp, kete barady. Alma aǵashy jalǵyzsyrap taǵy qalady. 
Ýaqyt ótip bala alma aǵashyna taǵy keledi. Alma aǵashy qatty qýanyp:
— Kel baıaǵy kúnderdegideı oınaıyq,-deıdi. Bala:
— Qaıdaǵy oıyn, men qazir áke atandym, maǵan úı kerek,-deıdi. Alma aǵashy:
— Men ne isteı alamyn? Sen meniń butaqtarymdy jınap alyp, sodan úı salyp al,-deıdi. Bala aǵashtyń barlyq butaǵyn shaýyp alyp, kete barady. Arada taǵy biraz jyl ótken soń bala aǵashtyń qasyna taǵy keledi. Aǵash qatty qýanyp:
— Kel, baıaǵydaı oınaıyq,-deıdi. Bala:
— Qandaı oıyn, men qazir el aǵasy boldym. Maǵan qaıyq kerek, ózge elge baryp dem alǵym keledi,-dedi. Aǵash:
— Men ne isteı alamyn? Sen meniń keýdemdi alyp, odan qaıyq jasap al, — deıdi. Bala aǵashtyń ortan belinen shaýyp alyp kete barady. Arada taǵy biraz jyl ótken soń bala alma aǵashyna qaıtadan keledi. Alma aǵashy:
— Meniń saǵan berer jemisim joq.
— Ony jeıtin mende tis te joq.
— Meniń saǵan berer butaqtarym da,keýdem de joq.
— Meniń olardy alatyndaı kúsh qýatym joq, tek saǵan súıenip otyrsam jetedi, — deıdi qartaıyp qalǵan bala. 
Alma aǵashy:
— Kel otyr, — dep shaqyrady. Bala alma aǵashyna súıkenip otyra ketedi, alma aǵashy eńkildep jylap qoıa beredi.

Bul oqıǵada baıandalǵan alma aǵashy bizdiń anamyz. Biz kishketaıymyzda árkez onyń qasynda boldyq, eseıip er jetken soń tipti hálin suraýǵa ýaqytymyz bolmady, al, ózimiz jeke úı bolǵanda anamyzdy oılaıtyn da ýaqyt bolmady...

Áńgime Álıa Nurbekovanyń feısbýk paraqshasynan alynǵan