QR aqparat jáne komýnıkasıalar mınıstri Dáýren Abaev qazaqstandyq ınternet-resýrstarda jasyryn pikir qaldyrýǵa tyıym salatyn túzetýlerdi túsindirdi, dep habarlaıdy Qamshy.kz aqparat agenttigi Sputnik Qazaqstan portalynyń málimetine súıenip.
Buǵan deıin májilis ınternet-resýrstarda jasyryn pikir qaldyrýǵa qatysty túzetýler jobasyn maquldaǵan edi. Oǵan sáıkes azamattar jasyryn pikir qaldyrmas buryn mindetti túrde tirkeledi. Biraq búrkenshik atpen jazýǵa tyıym salynbaıdy. Elektrondy resýrs ıeleri oqyrmandarmen elektrondy úkimet portalynda ıdentıfıkasıany nemese SMS-ıdentıfıkasıany qoldanýmen jazbasha kelisim bekitýge mindetteledi.
"Qazir, ókinishke qaraı, áleýmettik, ultaralyq alaýyzdyqty qozdyratyn pikirler kóbeıip ketti. Azamattarǵa til tıgizý, negatıv jetip artylady. Osyǵan baılanysty biz aqparat portaldaryna pikirdi kim jazǵanyn bilip, baqylap otyratyn múmkindik berý máselesin pysyqtap jatyrmyz", — dedi Abaev.
Mınıstr azamattar burynǵydaı búrkenshik atpen pikir qaldyra alatynyn atap ótti. Alaıda aqparat portaly búrkenshik attyń artynda kim turǵanyn bilip otyrady.
"Ultaralyq alaýyzdyqty qozdyrý, Konstıtýsıaǵa qaıshy áreketterge shaqyrý sekildi jaǵdaılar bolǵanda, sol azamatty baqylaýǵa, quqyq qorǵaý organdarynda oǵan narazylyq bildirýge múmkindik bolady dep oılaımyn", — dedi Abaev.
"İP-adresterdi jasyrýǵa bolatynyn sizder de bilesizder. Meniń oıymsha, bul qalypty praktıka. Ár adam pikirin bildirgisi kelse, emin-erkin, ashyq aıtýy tıis. Biz qandaı da bir syn, aqyl-keńes, paıdaly dúnıe úshin sońyna túspeımiz ǵoı. Bul jerde pikir bildirýdi múlde alyp tastaý máselesi kóterilip jatqan joq", — dedi ol.
Sondaı-aq, Abaev sheteldik resýrstarda pikir qaldyrý máselesi qalaı bolatynyna toqtaldy.
"Facebook sekildi áleýmettik jelilerge kelsek, biz tıisti habarlandyrý jumysyn júrgizemiz. Ol dál qazirgideı júzege asady, eger zańǵa qaıshy áreketterdi baıqasaq, feısbýk, ıýtýbke habar berip, ol materıaldar artynsha joıylady", — dep túıindedi mınıstr.
