Jýrnalıs Samat Nurlanbekuly óziniń Facebook paraqasynda "Ulttyq tanymnan ajyrap qalǵan keıbir qazaqstandyq kınolaryna sholý" atty taqyrypta post jarıalady.
"Qazir erinbegen kıno túsirgish bolyp alypty. Kıno túsirý sánge aınalǵan ba sonda? Sáninen góri bizge máni, maǵynasy mańyzdy ǵoı! Otandyq kınoóndirisine kishigirim sholý jasap kóreıikshi. Jalpy qazaq kıno rejıssýrasynyń ózindik mektebi qalyptasqan ba? Ia,álbette óz dástúri,ulttyq bet beınesi bolǵan. Ia, bolǵan!!! Qazir she, kún sanap sańyraýqulaqsha qaptap jatqan sapasyz, sanynda shek joq, dańǵaza kınosymaqtar jetip artylady. Attary da, taqyryptary da máńgúrttengen,dáldúrish,qazaq psıhologıasy men diline sorpasy qosylmaıtyn bos dalbasa dúnıeler. Bulaı aıtýdan esh qoryqpaımyn! Máselen myna kınolardy kıno dep aıtýǵa bola ma,álde: "Bıznes po kazahskıı, Oralman ız Pıtera, Brat ılı Brak, Sabınka Kelinka, 5 prıchın ne vlúbıtsá v kazaha, Pobeg ız aýyla, Skaz o rozovom zaıse, Ostorojno ıa Korova, Vırtýalnaıa Lúbov" taǵy basqa osy sekildi ne úıreteri joq, ne oı salmaıtyn, ne ulttyq boıaýy joq, ne mentalıtetimizge saı emes, áıteýir kıno dep aıtýǵa óz basym uıalatyn áńgúdik dúnıeler!!! Bularǵa kim bas kóz boldy, kim qarjy bóldi? Otandyq kıno óndirisiniń kórkemdik keńesi qaıda qarap otyr? Jalpy kıno, mýzyka, ádebıet, mádenıet adam balasyna tárbıelik mańyzy joǵary, rýhanı mazmuny tereń dúnıelerdi usynýy tıis. Kıno kórgende adam balasy oı túıe alatyn deńgeıge jetý kerek. Biz she,qazaq kórermenine ne usynyp júrmiz? Oralman ız Pıtera men Ostorojna ıa Korovadan qazaq kórermeni ne alady, neni túıedi? Bul kınolar seni izgilikke, ultty súıýge, tilińdi qurmetteýge ýaǵyzdaı ma? Joq! Ideologıa ólgen deısizder! Ideologıa ólse onda memlekettiń de óshkeni bolyp eseptelmeı me? Ideologıa ólgen joq, ol tek basqa arnaǵa aýysyp ketti! Ol óz qaǵynan jerinip ulttyq tanymǵa múlde kereǵar zattarmen aınalysyp ketti. Endi ne isteý kerek! Kórkemdik keńes kerek, kınoǵa da, mýzykaǵa da! Jerge syımaı, Kremlde jatqan Lenın shaldyń da: "Iz vseh ıskýsstv dlá nas vajneıshım ıavláetsá kıno!" dep aıtpap pe edi! Demek, kıno úlken ıdeologıalyq qural! Mýzykaǵa qazirshe tıispe aq qoıaıyn! Búginshe kıno tóńireginde ishte qaınap jatqan oılarymdy tógeıin. Keıipker máselesi, kınoǵa da, ádebıetke de birdeı ortaq! Ádebıet qazir keıipker izdeýden sharshady! Sebebi, keıipker joq degen aldamshy eles qoǵamdy áli kezip júr. Taǵy qaıtalap aıtamyn, keıipker izdep áýre sarsańǵa túspeńizder! Keıipker bar, ol seniń qasyńda otyrýy bek múmkin! Sen ony kúnde kórip, kúnde aralasyp, biraq onyń ishki jandúnıesin sezinbeýiń múmkin! Biraq sol adam naǵyz búginginiń ádebıetinde kórinis tabýy qajet! Tek ony kóre bil! Ádebıetti tilge tıek etip otyrǵan sebebim, osy ýaqytqa deıin jazylǵan myń roman, myń povestter, sonda qazirgi rejıserlerdi shabyttandyrmady ma? Qudaı aý, aspannan tús rejıser! Qazaq ádebıetiniń 1960- 1990 jyldary jaryq kórgen shyǵarmalary bolsyn, odan arǵysy, nemese keıingi týyndylary bolsyn árqaısysy kınoǵa suranyp tur ǵoı! Tek sony oqy, qazaq ádebıetiniń úrdisinen habardar bol! Syrttan, shetelden taqyryp izdeme! Mine, rejıserdiń oqyǵandyǵy osy jerden bilinedi! Kez kelgen rejıser menińshe, óz ulttyq ádebıeti men onyń qazirgi qubylystary men úrdisinen habardar, qulaǵdar bolýy minddetti dep oılaımyn...
Bir kún bolsa da elimizdiń iri qalalaryndaǵy úlken kınoteatrlaryndaǵy repetýar, afıshalaryna nazar aýdaryńyzshy. Gollıvýd pen Evropa kınolarynyń kóleńkesinde elimizde jylyna bir ret túsiriletin kınolar syǵalap, jáýteńdep turady. Sol kınoǵa barý kórsetkishi kóńildi kónshitpeıdi. Sebebin, jańa ǵana túsindirdim. Taqyryby nársiz, ulttyq tanymnan ada, dańǵazalyqqa urynǵan kıno degen aty bar dúnıeler! Jastarymyz qazaqstandyq kınolardy kórmeıdi degen jeksuryn stastıstıka qaıdan shyǵady? Birinshiden, sol táýelsizdigimizben túıdeı qurdas urpaqtyń talǵamy 25 jylda qalaı qalyptasty! Jaýap bireý aq, batystyń aǵyl tegil jaǵymsyz nópiriniń yqpalymen qalyptasty. Oǵan kináli kim, amerıka ma ? Joq, ózimiz! Sol tasqynǵa qarsy tura almadyq, sol nópirden qorǵanysymyzdy qalaı almadyq! Endi kesh pe? Joq, soqqy alǵan boksshy esin jıyp, aıaǵyna nyq turyp, qaıta urysqa kiretini sekildi bizdiń de esimizdi jıýmyz óte paıdaly bolar edi! Ol úshin, ıdoelogıalyq mehanızmniń maıyn aýystyryp, ol jaqsy jumys isteý úshin oǵan rýhanı nári joǵary, ulttyq ýyzǵa baı maı quıý kerek".
