Almaty oblysynda úılený toıyna barǵan jigit úıine oralmady. Bir top jigittiń tepkisine túsip, meıramhana mańynda kóz jumǵan. Osylaı degen otbasy músheleri ádildik izdep júr. Olar 23 jastaǵy Suńǵatty soqqyǵa jyǵyp óltirgender 1 aı ótse de, qamaýǵa alynbady dep otyr. Kúdikti kimder, olar nege bostandyqta júr? Máseleniń mán-jaıyn Astana telearnasy habarlady, dep jazady.
Begdalıevter áýletine qan juttyrǵan oqıǵa qazannyń 27-nen 28-ne qaraǵan túni bolǵan. Ákesi Ospandıardyń aıtýynsha, sol kúni keshke balasy Talǵar aýdanyndaǵy Kólsaı meıramhanasyna dosynyń toıyna ketedi. Biraq tún aýa saǵat 2 jarymdar shamasynda, toı ıesi Suńǵattyń aýrýhanaǵa túskendigin, habarlapty.
«Restorannyń aldynda ólgen. Bizge "óli denesin alyp keldi" dedi. Bul grýppovoı. Eshqaısysyn ustap otyrǵan joq. Bir balany ǵana alyp qaldy. Bul jerde eshqandaı ádildik joq. Meniń surarym, ádildik!» - Suńǵattyń ákesi Ospandıar Begdalıev.
Ákesiniń aıtýynsha, balasyn 9 buzaqy top bolyp tepkige alǵan. Shambaıyna batyp otyrǵany - barlyǵynyń qamaýǵa alynbaǵany. Óıtkeni kúdikti dep toǵyzy emes, tek ekeýi ǵana qamalǵan. Onyń birin kóp uzamaı bosatyp jibergen deıdi. Ospandıar Begdalıev Talǵar aýdandyq ishki ister bóliminiń tergeýshisi iske enjarlyq tanytqandyqtan, amalsyz oblysqa shaǵymdandym dep otyr. Qorǵaýshy 2 qarashadan beri bul iske úńilip, talaı shıkilikti tapqanyn aıtady.
Begdalıevter áýletiniń advokaty Kamshat Shıntekova: «Der kezinde aıǵaqtardy jınamaı, kýálardy anyqtamaı, sot medısına saraptaýynyń taǵaıyndaýy boıynsha qaýlymen jábirlenýshi tarapty tanystyrmaı jáne aıyptalýshylardyń kıimin ýaqytyly, der kezinde almaǵan. 99-shy bap, kisi ólimi oryn alǵandyqtan, sol bappen qozǵaýyn talap etip otyrmyz. Biraq talabym áli kúnge deıin qanaǵattandyrýsyz», - deıdi.
Al Almaty oblysy İshki ister departamentiniń ókili jigittiń ólimine eki kúdiktiniń qatysy bar deıdi.
«Atadlǵan iske baılanysty eki kúdikti ustaldy. 1994 jyly týylǵan olardyń birine Qylmystyq kodekstiń 106 baby boıynsha is qozǵalsa, ekinshisine «buzaqylyq» faktisimen aıyp taǵyldy. Qazirgi tańda kúdiktiniń biri úı qamaqqa shyǵaryldy. Ekinshi azamat ýaqytsha qamaýda. Qazirgi tańda is oblystyq tergeý basqarmasyna jiberildi».
