Adel úıinen shyqqanda kesh bata bastaǵan. «Jaýyn jaýar ma eken» dep oılaǵan ol qolshatyryn qolyna alyp taksı ustap uzaq turdy. Qurbylary kóp kútip qalmaý úshin úıine apyl-ǵupyl kirip, kıimin de aýystyryp úlgermeı, qolyndaǵy  zattaryn qoıyp úıden shyǵyp kete jónelgen.

Kúzdiń sońǵy aılary bolǵandyqtan ba, álde tabıǵattyń basqa da tylsym kúshteriniń aralasýynan ba, osy kún aıtarlyqtaı yzǵarly, susty, qaharly edi.

Úsh kún buryn josparlanǵan bul kezdesýge Adel asyǵys. Sebebi bir aıdaı júzin kórmegen qurbylaryn kórip, saǵynyshyn baspaq. Qurylys kompanıasyna jumysqa kirgeli beri tipti qoly bosamaı ketkenin oılap, jol boıy balalyq shaǵyna esine alyp, tereń oıǵa shomyp ketti.

Kópten kútken kezdesýdiń sońy uzaqqa sozylyp, qyzdar bir-birin qımaı uzaq otyrdy.  Kıno kórip, keshki as iship máz-meıram bolyp, aıtar áńgimeleri taýsylmaı ketti.

— Adel, jumysta bireýdi kezdestirdiń be?-deıdi qurbysy Tolǵanaı.

— Tomka, qoıshy... Kezdesý, qarym-qatynasqa ýaqytym joq,-deıdi Adel keıip.

— Ondaıdy qoı, jasyń 24-ten asyp barady. Jalǵyzdyq qudaıǵa ǵana tán.

— Iá, qudaıǵa senetinder úshin solaı shyǵar,-deı jazdady da, jáı ǵana jymıyp qoıdy.

Alaıda,Tolǵanaı qurbysynyń bul jymıysynan  buryn-sońǵy baıqamaǵan ersi qylyqty, jat nárseni baıqady. «Jymıys kóp jaǵdaıda kelisimdi bildiredi ǵoı» dep oılady ózin jubatqan bolyp.

Beımezgil ýaqyt ornap, tym kesh bolyp ketkenin sezgen qurbylar qaıtpaqqa nıettendi. Anda-sanda kezdesetin kez kelgen qurby-qurdas sekildi bular da, taǵy da kórisýge ýádelesip jan-jaqqa tarady.

Eki qyz bólek ketip, qalǵandarynyń da  joly birge túskendikten Adel jalǵyz qaldy. Jalǵyzdyqtan eshqashan qoryqpaıtyn batyl qyzdyń dál osy ýaqytta kóńili qubylyp, basy aýyrdy. Úıine jaqyndaı bergen kezde ózin nashar sezine bastady. Tar kósheler tarylyp, jer betin qarańǵylyq basqan tárizdi bolyp,  aınaladaǵy barlyq úılerdiń shamdary óship qalǵan sekildenip ketti. Sýyq aýa betin qaryp, eseńgirep ketken qyzdyń esin jıǵyzdy. Nege ekeni belgisiz Adeldiń boıyn qorqynysh bılep, áldeqaıdan jylaǵan balanyń daýsyn esitkendeı boldy.

«Tezirek úıge jetý kerek. Bári jaqsy bolady. Qazir meniń basym aýyryp tur, neshe túrli nárse elestegeni de sondyqtan» dep ózimen ishki monolog júrgizip kele jatqan ýaqytta jylaǵan bala daýsy qaıta biraq anyq estildi.

Eger Adel ateıs bolmaǵanda, dál osy sátte múmkin Qudaıǵa syıynyp,  duǵa eter ma edi?  Biraq ol tyń-tyńdap turyp qaldy. Elestep tur ma, álde rasymen balanyń jylaǵany ma? Túsinbedi.

Ózi kele jatqan kósheniń eń túkpirinde, tómengi buryshta álgi daýysty taǵy estidi. Bul joly  balanyń shyńǵyrǵan, «Qutqaryńdar!» dep jalynǵan daýsy álsin ǵana shyqqandaı boldy.

Óńi qashyp ketken Adel júregi tastaı qatyp áldeneshe sekýnd boıy qımyl-qozǵalyssyz qaldy.

Kóp adamdar sumdyq, jantúrshigerlik qorqynyshty nárseni kórgende aıqaıǵa basyp, tamaǵy qarylǵansha bar pármenmen shyńǵyryp kirerge jer tappaı ketetin sıaqty bolyp kórinedi. Shyn máninde, sumdyqpen betpe-bet kelgen adam únsiz, tilsiz, jansyz, qımylsyz qalady eken.

Birtalaı ýaqyt "jan men tán arasynda" qalǵan Adel bir sátte esin jıyp, óziniń tiri ekenin sezingen soń japa tarmaǵaı júgire jóneldi. Qashty. Neden qashyp bara jatqanyn ózi túsinbeıdi. Qarańǵy kóshe túbindegi daýystan qashty ma, baladan qashty ma, álde sol balany daýsyn shyǵaryp shyńǵyrtqan áldeneden ıakı adamnan qoryqty ma – bar oıy osy kósheden alystaý boldy.

Tek úıine jetken soń ǵana demin alyp, uzaq otyrdy.

Adel qorqynysh pen sumdyqtyń arasynda turǵan sáttegi estigen bala daýsy – onyń túsi, ıa bolmasa oıdan shyǵarǵan qıaly emes edi. Dál sol sátte sábı júrek Daryn ólim men ómir arasyndaǵy arpalysty bastan keshirip jatqan.

 5-synyp oqýshysy Daryn aýdandyq fýtbol komandasynyń úzdigi. Aqyl-oıy tereń, zerek bala bolyp ósip kele jatqa. Jáne osy saǵattarda  ol jan tásilim etti. Ony óltirgen janýar ıakı adam balanyń túgin qoıǵan joq, tipti máıitin de qaldyrmady.

Sol túnniń ertesinde Adel keshegi jaǵdaı týrasynda kóp oılandy. «Esimnen aljastym ba eken» degen oı ony  mazalap, endi biraz ýaqyttan keıin jaǵdaıy tipti qıyndap ketti.

Shynymen-aq balanyń daýsyn estidim be? Ol kim boldy eken? Solaı bolǵan bolsa, ne jaǵdaı oryn aldy? Álde bul pedofıl boldy ma eken? degen suraqtar oıyna kelip, ony ary mazalaı bastady.

Arada eki kún ótken soń Adel basynan ótken jaǵdaı týraly oılamaýǵa tyrysyp júrdi. Umytqandaı boldy.  Keshe jaqyn úıinde kitap oqyp otyrǵan ýaqytta, kózi ilinip ketip, bastyryldy.

Álgi kóshe. Álgi bala. Shyńǵyrǵan daýys. Barlyǵy qaıtalanyp jatty. «Kómektes!» degen ashshy daýys. Qoly, aıaǵy joq, basy jarylyp qany sorǵalaǵan, julym-julym  bolyp kele jatqan bala qasyna jaqyndap kelip: «Men seni shaqyrdym ǵoı... Nege maǵan járdemdespediń?»-dedi. Basynan, qol-aıaǵynan qan sorǵalaǵan 10 jas shamasyndaǵy bala Adeldiń qolynan shap berip ustady da: «Ol seniń artyńnan keledi» dedi.

Osy sátte Adel shoshyp oıandy. Terlep, ábden qınalyp ketken ol ne isteý kerek ekenin ańǵarǵandaı,  ary mazalaǵan suraqtyń jaýabyn izdeýge kóshti.

Tań atqan soń Adel jolǵa shyqty. Birneshe kún buryn ózi  qashyp ketken kóshege qaıta oraldy. Kúndizgi ýaqytta da óziniń susty keıpin joǵaltpaǵan bul kósheniń sońy qaqpalar men eski qańyltyrlar úıilgen jerge kelip tireledi eken. Adel bul  jerdi áldeneni izdegendeı uzaq qarap zerttedi. Eshteńe tappaıtynyn bilip, endi buryla bergende jylt etken qyzǵylt mataǵa kózi tústi. «Mynaý ne eken» dep eńkeıip qańyltyr astynda qalǵan zatty aldy. Ol julym-julym bolǵan bas kıimniń qaldyǵy eken. Tula boıy titirkenip ketken Adel munda bir sumdyqtyń bolǵanyn túsindi.

Bul jerden dereý ketkisi kelip, kóshe basyna qaraı aıańdady. Tynysy tarylyp, óziniń  sol túni qandaı qatelik jasaǵanyn oılap  mazasy ketti. Alaıda ony ar azabyna qaraǵanda qorqynysh sezimi kóbirek tolǵandyrdy osy sátte. «Ol seniń artyńnan keledi» degen balanyń sózin esine túsirdi.

Birneshe kúnnen soń teledıdardan osydan bir apta buryn joǵalyp ketken bala týraly habar tarady. 11 jastaǵy mektep oqýshysy  úıine qaıtqan jolda iz-tússiz joǵalyp ketken.

Muny estigen Adel balanyń sýretin anyqtap qarady. «Dastan Nıazovtyń ústinde   qyzyl bas kıim men qara kúrteshe bolǵan. Kórgen-bilgender men qandaı da aqparat  bere alatyndar úshin tómendegi nómirlerge habarlasýlaryńyzdy suraımyz» dep jatty teledıdardaǵy daýys.

Adel tereń kúrsindi. Jaqynda taýyp alǵan qyzyl bas kıimdi qaıda qoıǵanyn esine túsirip, sol keshti taǵy esine aldy.

Bólmesinde turǵan shkaftyń esigin ashyp, ishindegi aınaǵa kózi tústi. Shoshyp ketti. Túrim ne bolyp ketken? Ózin emes, qubyjyq kórgendeı shoshynyp, esikti tars jaýyp jýynatyn bólmege kirdi. Sol jerdegi aınaǵa qarap esin jıdy. Betin, kózin ustap jeńil kúrsindi. «Esimnen aljasatyn boldym...».

Adel jýynatyn bólmede turyp betine sý shashyp turǵanda áldene  túskendeı selt ete qaldy. Qatty shoshynǵannan jerge otyryp qaldy. Dirildep ketti. Mańdaıy tamshy-tamshy terge tolyp qoryqqanynan júregi aýzyna tyǵyldy. Bul sátte, jatyn bólmede turǵan shkaftyń ishinde eshqandaı aına joq ekeni onyń esine túsken edi.

Sonda.. Sonda.. Ol ne boldy.. Álde kim...

«Ol seniń artyńnan keledi» degen daýys qubyrlardyń ishinen  estilgendeı boldy. Adel demin ishine tartyp,  jýynatyn bólmeniń esigin aqyryn ǵana ashty. Sol-aq edi, qolyn túk basqan alyp qol ony ózine qaraı tartyp áketti.

Dala qyzy