14 jeltoqsanda QR Ulttyq kitaphanasynda «Qaz daýysty... bı» derekti fılminiń tusaýkeseri ótedi, dep jazady Qamshy.kz aqparat agenttigi.
Bıyl Qazaq Ordasynyń kemeńger bıi, memleket jáne qoǵam qaıratkeri Qaz daýysty Qazybek bıdiń 350 jyldyq mereıtoıy Qaraǵandy oblysynda atalyp ótti.
Osyǵan oraı Qaraǵandy oblysy ákimshiliginiń bastamasymen QR Mádenıet jáne sport mınıstrliginiń tapsyrysy boıynsha Sháken Aımanov atyndaǵy «Qazaqfılm» kınostýdıasy qysqa merzimde «Qaz daýysty... bı» atty derekti fılm túsirdi. Fılm rejıserleri Ǵazız Nasyrov pen ánshi, ónertanýshy Erlan Tóleýtaı.
Fılmniń túsirilim barysy jaıynda Erlan Tóleýtaı jazdy. Qazybek bıdiń memleketshil bıik tulǵasyn derekti fılm arqyly saralaýǵa tyrysqan rejıserler úshin Qazybek bıdiń ómiri men qyzmetin kıno tilinde rekonstrýksıalaý ońaıǵa soqpaǵan. Ol úshin Erlan Tóleýtaı men Ǵazız Nasyrov Qazybek bı jaıly el aýzyndaǵy ańyzdar men Reseı jáne Qytaı muraǵattarynda saqtalǵan jazba derekterdi jınaǵan.
«Bul árıne ońaıǵa soqqan joq. "Delıka" jol talǵamaıtyn japonnyń kóligimen 8 000 shaqyrymnan asa jol júrip, bir sheti Pavlodar, Qaraǵandy bir sheti Ońtústik Qazaqstan oblysy, Qyzylorda oblysynyń shegine deıin baryp qaıttyq. Az ýaqyttyń ishinde 20 saǵattaı vıdeo materıal túsirip úlgerdik. Árıne, saparymyz qaýip-qatersiz bolǵan joq dep aıta almaımyz.
Máselen, Qaz daýysty Qazybek bı 1764 jyly aqpan aıynda qaıtys bolǵanda qys qaharly, qar qalyń bolǵandyqtan, jer aıaǵy keńigenshe dep balasy Bekbolat pen Edige bıler uly bıdiń máıitin sórege saqtaýǵa uıǵarǵan. Osy qys aıynda bolǵan oqıǵany sýretteý úshin Alataýdyń bir asqar bıigi - 3800 metrlik "Molodejnyı" atalatyn bıik shyńyna shyǵyp, alty qanat úı tiktik. Óıtkeni mezgil tamyzdyń sońy, Alataýǵa qar túsip úlgermegendikten, osylaı jannan bezip, máńgi muzdyqtarǵa kóterilýge májbúr boldyq. Alataýdyń qulama jartasty, túpsiz shyńyraýlarynan asyp ótkenimizdiń ózi bir ǵajaıyp hıkaıa. Bárin jazyp otyrýǵa ýaqyt tapshy», - dep jazdy ánshi.
Fılmniń basty keıipkerleriniń biri, beıbitshilik kúreskeri, sýretshi Káripbek Kúıikov
Túisirilim barysy qıynǵa soqqanymen qysqa merzimde túsirilgen fılm Almaty kórermenderine jol tartpaq.
