Almatyda Elbasynyń «Rýhanı jańǵyrý: bolashaqqa baǵdar» baǵdarlamalyq maqalasyn júzege asyrý aıasynda, elimizdiń astanasyn Almatydan Aqmola qalasyna kóshirýiniń jıyrma jyldyǵyna arnalǵan «Astana tarıhy» atty ǵylymı-kópshilik kitabynyń tusaýkeseri ótti.
Tusaýkeserge Almaty qalasy basshylyǵy, tanymal tarıhshylar men ǵylymı zertteý ınstıtýttarynyń dırektorlary, mýzeıler men arhıv basshylary jáne t.b. bedeldi qoǵam qaıratkerleri qatysty.
Aıta keteıik, «Astana tarıhy» ǵylymı kitabynyń avtory – Sh.Ýálıhanov atyndaǵy Tarıh jáne etnologıa ınstıtýtynyń dırektory, tarıh ǵylymdarynyń doktory, profesor Zıabek Qabyldınov.
– Bul eńbekte ejelgi dáýirden bastap búgingi kúnge deıingi qala tarıhy, ólkeniń ataqty tulǵalary (mysaly: Qanjyǵaly qart Bógenbaı, Qajymuhan Muńaıtpasuly, Imanjúsip Qutpanuly, Marıam Jagorqyzy, İlıas Esenberlın, R.Qoshqarbaev, J.Táshenov t.b.) sonymen qatar, Elbasynyń «Rýhanı jańǵyrý» maqalasyna sáıkes, eńbegimniń jetinshi bóliminde qazaq halqynyń ádet-ǵuryptary men ultyq qundylyqtary, dástúrleri baıandalǵan. Bul kitapty jazýǵa eki-úsh jyl boıy eńbektendim. Kitap úsh tilde jaryqqa shyǵady. Kitaptyń jaryqqa shyǵýyna tehnıkalyq sebepker, muryndyq bolǵan «Atamura» korporasıasy. Úsh myń danamen oqyrman qaýymǵa taratylatyn bolady. «Astana tarıhy» kitabynyń maqsaty – Astana arqyly qazaqtyń kim ekenin, qazaq halqyn kópshilikke tanytý. Sondaı-aq, «EKSPO-2017» kórmesiniń ashylý qarsańynda jáne astananyń Almatydan Aqmolaǵa (Astanaǵa) kóshirilgenine 20 jyl tolý mereıtoıyna oraı jazylǵan,- deıdi avtor Zıabek Qabyldınov.
Shara barysynda avtordyń áriptesteri, tarıhshylar óz pikirlerimen bólsiti. Sondaı-aq, Táýelsizdik merekesi men Alashorda úkimetiniń 100 jyl tolýyna oraı, Sh.Ýálıhanov atyndaǵy Tarıh jáne etnologıa ınstıtýty qatysýshylar men qonaqtarǵa «Alash qaıratkerleri beınelengen» tós belgiler men avtordyń jańa kitabyn syılyqqa berdi.
- Táýelsizdik merekesi aıasynda ótkizip otyrǵan shara, eldigimizdiń, tarıhymydyń túgendelýi dep sanar edim. Men baspager bolsam da, kitapty sholyp shyqtym. Zıabek naqty derekter keltirip, Qajymuqan Muńaıtpasulynyń erlikterin jaqsy kórsete bilgen. Ásirese, tórtinshi taraý maǵan áser qaldyrdy. Sondaı-aq, «Aljır» lagerindegi áıelderdiń qatal taǵdyry áserli beınelengen. Avtordyń bir ereksheligi meniń baıqaǵanym, jyl saıyn týǵan kúninde bir kitaptyń tusaýy kesiledi eken. Sondyqtan, alaýlatyp, dúrkiretip týǵan kún jasaǵannan, ǵylymǵa úles qosyp shyǵarmashylyǵyn shyńdaǵanyn maqtanyshpen aıtqym keledi, - deıdi «Atamura» korparasıasynyń prezıdenti Rahymǵalı Qulmuhammed.
«Astana tarıhy» kitabynyń tamasha mazmuny kópshiliktiń kóńilinen shyǵyp, ystyq yqylasqa bólendi.
