QR Aqparat jáne komýnıkasıalar mınıstrliginiń qoldaýymen «Qazaqstan» RTRK» AQ uıymdastyrýymen Astanada qazaq saıttary redaktorlarynyń forýmy bastaldy, dep habarlaıdy Qamshy.kz aqparat agenttigi. Forýmdy AQSH elshisi Djordj Krol ashty.
Shara maqsaty – qazaq tildi saıttardy damytý, kontent sapasyn arttyrý jáne ózekti máselelerdiń sheshimin tabý.
Forým barysynda sóz bastaǵan Qazaqstan Baspasóz klýbynyń atqarýshy dırektory Sáken Balbaev sharanyń tabysty ótýin tiledi.
«Qazaqstannyń aqparat quraldary damysa, elimizdiń ulttyq qaýipsizdigi de nyǵaıady. Saıttar – qazirgi zamannyń úzdik quraldary. Internettiń yqpaly gazetterge qaraǵanda keńirek», - dedi Balbaev.
Al «Qazaqstan» RTRK» AQ Basqarma tóraǵasy Erlan Qarın Ulttyq arnanyń sharany uıymdastyrýdaǵy maqsatyn aıtty.
«Qazaq medıa salasynda júrgen azamattarǵa ádistemelik kómek bolsyn degen maqsatta uıymdastyrdyq. Jańa ádister, tehnologıalar qoldaný kerektigi jóninde pikir almasý tásili arqyly ótsin degen oıdamyz. Ulttyq arnanyń qandaı qatysy bar desek, búgingi tańda dástúrli baǵyt pen jańa medıany bólip qarastyrýǵa bolmaıdy. Ekeýi bir-birimen ushtasyp, tyǵyz baılanysta damyp jatyr. Biz televızıalyq ónimderdi shyǵarýmen aınalysyp jatsaq ta, Ulttyq arnanyń aldynda turǵan negizgi máseleniń biri, ınternet salasy arqyly ónimderimizdi keńeıtý. Bolashaqta jańa ónimniń barlyǵy osy salada keńirek damıtyny anyq», - dedi Erlan Qarın.
Sondaı-aq, osy salaǵa qatysty Ulttyq arnanyń aldaǵy josparymen de bólisti
«2018 jyldyń qańtar aıynda Qazaqstan ulttyq arnasynyń jańa qosymshasyn nazarlaryńyzǵa usynamyz. Múmkindiginshe sheteldik tájirıbeni, qazirgi aýdıtorıanyń suranysyn, talabyn eskere otyryp jasaýǵa tyrysamyz. Tele serıaldar men fılmder úshin de jańa qosymshalar damıtyn bolady. Budan basqa kelesi jyldyń birinshi jartysynda taǵy bir úlken sharany uıymdastyrýdy kózdep otyrmyz. Onda Qazaqstannan ózge sheteldik mamandardy da shaqyryp semınarlar ótkizemiz. Bizdiń maqsatymyz – osy saladaǵy múmkindikterdi keńinen paıdalaný, kórermenderge, ónimderdi tutynýshy aýdıtorıaǵa jańa ónimde, jańa formatta usynǵymyz keledi. Bul bárimiz úshin paıdaly jıyn bolmaq», - dedi Ulttyq arnanyń basqarma tóraǵasy.
Qazaqstannyń túpkir-túpkirinen blogerler men saıt redaktorlary jınalǵan forým búgin keshke deıin jalǵasady. Aıta keteıik, forým 2012 jyldan beri elimizde dástúrli túrde jalǵasyp keledi.
