- Nege biz óz kemshiligimizdi túzetpeı, ózgeden kemshilik izdeýge qumarmyz?
- Nege biz bólingendi jaqsy kóremiz?
- Nege biz Naýryz meıramynda aǵash otyrǵyzyp, Jańa jyl merekesinde qaıta kesip alamyz?
- Nege biz ata-babamyzdyń myqtylyǵyn aıtamyz da, solardaı myqty bolýǵa tyryspaımyz?
- Nege biz ul-qyzdarymyzdyń tárbıesine emes, tamaǵynyń toq, kıiminiń kók bolýyna kóp kóńil bólemiz?
- Nege biz araq pen temekiniń zıan ekenin bile tura sol nárselerden aryla almaı kelemiz?
- Nege biz ózge elderdiń jaman qylyqtaryn tez úırenip, jaqsy jaqtaryn úırenbeımiz?
- Nege biz smartfonnyń betin saǵattap sıpap, kitap oqýǵa kelgende ýaqyt tappaımyz?
- Nege biz ádiletsizdikti kórip tursaq ta úndemeıtin boldyq?
- Nege biz ózimizden basqa eshkimge kerek emes ana tilimizde sóıleýdi ar sanap, ózgeniń tilinde sóıleýdi abyroı kóremiz?
- Nege biz «ishime syıǵan qyzym, syrtyma da syıady» dep, óz qyzymyzdyń qaıtyp kelýine, «ekinshi ret úılengende turǵan ne bar eken» dep uldarymyzdyń ajyrasýyna jol ashamyz?
- Nege biz bireýdi maqtasaq jer-kókke syıdyrmaımyz, al jamandasaq jerge tyǵyp jiberemiz?
- Nege biz etek-jeńin qymtap, aryn saqtaǵan aıaýly qyzdarymyzdy synap, kún bermeımiz de, etegin ashyp, aryn satqan, úıde otyryp bala tapqan, uıatsyz qyzdarymyzdyń is-áreketine beıjaı qarap júre beremiz?
- Nege biz ýaqytym bos ótti dep ýaıym jemeımiz?
- Nege biz, erkekter ósek aıtýda áıelderden asyp túsemiz?
- Nege biz bul dúnıeniń jalǵan ekenin bilsek te, osy ómirde máńgi qalatyndaı taırańdap júremiz?
- Nege biz betimizge shyndyq aıtylsa sheke-basymyz tyrysyp, maqtaý estisek máz bolamyz?
- Nege bizde jemqorlar temir tordyń ar jaǵyna toǵytylyp jatsa da, paraqorlyqtyń paıyzy azaımaı tur?
- Nege osy bizdiń erteńimiz taýsylmaıdy?
Meni osy suraqtar mazalaıdy. Al sizdi she, qadirli oqyrman?!
Turarbek Sámetuly
