«Qazatomónerkásip» kompanıasy Tegeranmen 2015 jyly ıadrolyq kelisim jasasqan álemdik alty derjavadan ruqsat alǵanǵa deıin Iranǵa ýran jetkizýdi keıinge qaldyrdy dep habarlady sheteldik BAQ. Bul týraly Qamshy.kz aqparat agenttigi Azattyqqa súıenip jazady.
Iadrolyq kelisim boıynsha, Tegeran ıadrolyq baǵdarlamasyn doǵaryp, esesine Iranǵa salynǵan ekonomıkalyq sanksıalar jeńildetilýi tıis.
Brıtandyq New Europe aqparattyq saıtynyń habarlaýynsha, «Qazatomónerkásip» tóraǵasy Ǵalymjan Pirmatov 21 jeltoqsanda Astanada ótken brıfıńte Iranǵa ýran konsentraty ıadrolyq kelisimge qol qoıǵan AQSH, Reseı, Qytaı, Ulybrıtanıa, Fransıa jáne Germanıanyń maquldaýynan keıin ǵana jetkiziletinin aıtqan.
Iran Qazaqstannan 950 tonna ýran konsentratyn satyp alý týraly kelisimge 2016 jyldyń sáýirinde qol qoıǵan. Ol kelisim boıynsha, ýran bıyl jetkiziledi dep josparlanǵan, biraq alty elden ruqsat alý merzimi sozylyp ketken soń ol keıinge qaldyrylǵan.
Irandyq Financial Tribune saıtynyń habarlaýynsha, «Qazatomónerkásip» kelisim kúshin 2020 jylǵa deıin uzartqan jáne ýran alty elden ruqsat alynǵanyna qaraı 2018-2020 jyldary jetkiziledi dep josparlanǵan.
