26 jeltoqsanda Májiliste Áleýmettik-mádenı damý komıtetiniń otyrysy sheńberinde Kınomatografıa týraly» Zań jobasynyń tanystyrylymy ótti, dep jazady Qamshy.kz aqparat agenttigi.
Sharany ashqankomıtet hatshysy B. Mamraev elimizdegikınomatografıa salasyna toqtala kele:
-Ózderińizge belgili, Qazaqstan kınematografıasynyń tarıhy joq emes. Ol jeke áńgime. Biraq elimiz egemendik alǵannan beri kıno týraly zańnyń qajettiligi, máseleniń ózektiligi artpasa azaıǵan emes. Osy baǵytta búgin qyzyqty jáne maǵynaly talqylaý bolady dep senemiz, - dedi.
Odan ári Mádenıet jáne sport mınıstri Arystanbek Muhamedıuly zańnamadaǵy jańalyqtar týraly baıandady.
- Elbasy altynshy shaqyrylymdaǵy Qazaqstan Respýblıkasy Parlamenti sesıasynyń ashylýynda bergen tapsyrmasynyń arqasynda «Kınematografıa týraly» Zań jobasy alǵash ret ázirlendi.Ónerdiń mańyzdy salalarynyń biri – kıno salasyna asa mán berip, mádenıetimizdi jahandyq arenaǵa keńinen tanymal etý búgingi kúnniń kezek kúttirmeıtin máselesi. Sondyqtan bul bastama barshamyzǵa orasan zor jaýapkershilik júkteıdi. Birinshi kezekte, zańnamalyq sharalar arqyly ulttyq kınematografıaǵa qoldaý kórsetý, ony jańa sapalyq deńgeıge shyǵarý jolyndaǵy qoǵamdyq qarym-qatynastardy retteıtin mańyzdy quraly ekenin eskerýimiz tıis. Ekinshiden, otandyq kınonyń mártebesin joǵarylatyp, qazaqstandyqtardyń ulttyq kınoǵa degen qyzyǵýshylyǵyn arttyrý qajet. Úshinshiden, barlyq damyǵan elderde qalyptasqandaı, ulttyq kınony jahandyq keńistikke shyǵarý arqyly elimizdiń mádenıetin tanymal etý búgingi basty máselelerdiń biri, - dedi mınıstr.
Depýtattarǵa usynylǵan Zań jobasynyń maqsaty – ulttyq fılmderdiń sapasyn jáne básekege qabilettiligin arttyrý, halyqqa arnalǵan kınokórsetilim qyzmetiniń qoljetimli bolýy, kınoındýstrıanyń ashyqtyǵy men ınvestısıalyq tartymdylyǵy, shetelderde qazaqstandyq kıno mártebesiniń ósýi men ony moıyndaý bolyp tabylady. Jalpy aıtqanda, joba kıno ónerin ári qaraı damytý úshin kınomatografıa salasyndaǵy qatynastardy retteıtin tıimdi quqyqtyq negizdi qurýǵa múmkindik bermek.
Búgingi tańda «Mádenıet týraly» Zańda fılmderdi «ulttyq» dep tanýǵa, prokattyq kýálikter berýge, olardy ındeksteýge, bastapqy materıaldaryn saqtaý túrleri men prokat tiline baılanysty qatynastardy retteıtin alty bap kózdelgen. Bul kınomatografıany damytýdyń qazirgi zamanǵy talaptaryna tolyq jaýap bermeıdi. Osyǵan baılanysty Zań jobasy otandyq kınoındýstrıany odan ári damytýdyń tujyrymdamalyq negizin kózdeıdi. Onyń biri Ulttyq kınony memlekettik qoldaý qoryn qurý jáne onyń jumys isteýi bolyp tabylady. Qor óndirisine, prokattaǵa, shyǵarýǵa, kórsetýge jáne ulttyq fılmderdi odan ári ilgeriletýge bólinetin memlekettik qarajatty bólýdiń negizgi operatory bolmaq.
Shara barysynda Qýanysh Sultanov, Záýresh Amanjolova, Gennadıı Shıpovskıh jáne basqa da depýttattar kıno óneri salasyndaǵy birqatar máselelerge nazar aýdaryp, mınıstr Arystanbek Muhamedıulyna suraqtar qoıyp, usynystaryn bildirdi. Osy rette, Májilistiń Áleýmettik-mádenı damý komıtetiniń otyrysy sheńberinde depýtattar tarapynan usynylǵan usynystar men eskertýler nazarǵa alynatyn bolady.
Zań jobalarynyń tanystyrylymyna Parlament Májilisiniń depýtattary, ortalyq atqarýshy organ jáne elimizge belgili rejıserler Satybaldy Narymbetov, Rústem Ábdirashev sıaqty shyǵarmashylyq zıaly qaýym men úkimettik emes uıymdardyń ókilderi qatysty.
