Iranda birneshe kúnnen beri jalǵasyp jatqan narazylyqtar barysynda 10 adam mert bolǵany týraly osy eldiń memlekettik telearnasy habarlaǵan. Reuters agenttiginiń jergilikti bılikke silteme jasap habarlaýynsha, qańtardyń 1-i kúni Nadjafabad qalasyndaǵy qaqtyǵystar kezinde narazy adam oq atyp, saldarynan polısıa qyzmetkeri ólgen.
Bul elde narazylyqtar bastalǵaly beri qaýipsizdik kúshteri ókilderinen qaza tapqan alǵashqy adam dep habarlandy. Úkimet ókili Saıd Montazer ál-Mahdıdiń memlekettik telearnadan málimdeýinshe, kúdikti ańshy myltyǵynan oq atqan. Oqıǵa saldarynan taǵy úsh polısıa qyzmetkeri jaralanǵan, dep Qamshy.kz aqparat agenttigi Azattyqqa silteme jasap habarlaıdy.
Irandaǵy jappaı narazylyq aksıalary jeltoqsannyń 28-i kúni eldiń birneshe qalasynda bastalǵan. Áýelde ekonomıkalyq saıasat pen baǵa qymbatshylyǵyna narazylyq bildirgender keıin úkimetti synaýǵa kóshken. Demonstranttar polısıaǵa tas laqtyryp, kólikterdi aýdaryp tastaǵan.
Jeltoqsannyń 30-y kúni Tegerandaǵy narazylyq sharalary barysynda 200 adam ustalǵan, olardyń arasynda 40 adamdy bılik "zańsyz jıyndardy bastaýshylar" dep ataǵan.
Jeltoqsannyń 31-i kúni Iran bıligi Instagram áleýmettik jelisi men Telegram messendjerin buǵattap, bul sheshimdi "beıbitshilik pen azamattardyń qaýipsizdigin" qamtamasyz etý qajettigimen túsindirgen.
Iran prezıdenti Hassan Roýhanı tártipsizdikter men qoǵamdyq menshiktegi múlikti búldirip-qıratýdy aıyptaǵan, biraq sonymen birge ol úkimetti azamattardyń "zańdy syn men narazylyq bildirýine múmkindik jasaýǵa" shaqyrǵan.
