27 qańtarda Ál-farabı atyndaǵy qazaq ulttq ýnıversıtetiniń 4-kýrs stýdenti , aqyn, Marǵulan Aqan óziniń eń alǵashqy «Kóktoǵaıdan kóshken bult» atty jyr jınaǵynyń tusaýyn kesti. Talaı márte respýblıkalyk, halqaralyq múshaıralardyń jeńimpazynyń óleńin tyńdaýǵa adam kóp jınaldy. Jyr keshi stýdentter men ustazdardyń, sondaı-aq tanymaly aqyn aǵalardyń qatysýymen ýnıversıtet qabyrǵasynda ótti. Keshke «Kókjıek» pen «Suńqar» stýdentter uıymy qoldaý kórsetti. Alǵashqy sóz kezegin fılologıa fakúltetiniń dekany Ómirhan Ábdımanuly aldy. Marǵulan Aqannyń bıyl bitirip bara jatqanyn, osy tórt jyl ishinde ulttyq ýnıverdiń qoǵamdyq ómirine kóp úles qosqanyn aıta kelip, Rektordyń atynan beriletin «Altyn tósbelgi» tabystady. Keshtiń qurmetti qonaqtarynyń biri bedeldi aqyn Murat Shaımaranuly boldy. Sóz kezeginde Marǵulannyń óleń ólkesine basqan qadamyna sáttilik tileı otyryp, aqyndyǵyna joǵary baǵa berdi. Ásirese Ámirhan Balqybekke arnaǵan óleńin oqyp qatty áserlengenin aıtty. Jas aqyndarǵa ustanym retinde:«Poezıaǵa taza kelińder, eshqandaı pendeshilikti aralastyrmańdar!» dedi. Sońynda aq batasyn berip Marǵulannyń bergeninen eline bereri kóp ekenin aıtty. Marǵulan Aqanuly óz óleńderin oqydy. Aqynnyń «Sheshe», «Eı,Almaty!», «Hat», «Maımul tas», «Kókpar» óleńderi úlkenderge unasa, «Mahabbat», «9-etaj nemese sezim balkony», «Qıaldaǵy arý» óleńderi jastardyń júreginen oryn aldy.

Aqynnan jyr jınaǵynyń atyn ne úshin «Kóktoǵaıdan kóshken bult!» dep qoıǵanyn suraǵanda: «Men toǵyz jasymda atajurtqa oraldym. Negizi kindik kesip kir jýǵan jerim –QHR-ndaǵy Kóktoǵaı. Ospan batyrdyń eli. Men atajurtyma aqsha bult bolyp Kóktoǵaıdan toǵyz jasymda kóshtim» dep túsindirdi.

Teńelgendeı naýryzda qysqa kún, Táýelsizdik tańyn appaq qushqanyń. Kel, baýyrym, dalań nege jatsynsyn? Tar zamanda qasqyr tartqan pushpaǵyn.

Kel, baýyrym, dalań nege jatsynsyn? El baýyryn eljiretip tapsyn shyn. Jet tezdetip, jetem degen kúniń bul, Jete almasań qýrylǵan apshymsyń.

Mynaý-dalań, mynaý –qalań, jatsynba, Erke ózendeı erkin aǵyp tasqynda. Bilesiń be, jony jomart qyrlardyń, Ata-babań basy jatyr astynda.

Jel taraǵan, saǵym dala qyrlardyń, Tyńda kelip, shermen sherter syrlaryn. Maýqyn bir bas aýnap dala tósine, Jýsan ısin ańsap ótken jyldardyń.

Jýsan ıisi, ol-babańnyń ıisi, Esken samal-tulparlardyń júrisi. Sary dalada kórkiregen kún degen- Batyrlar men bahadúrler kúlkisi.

Jjet tezdetip, jete almasań saǵan syn, Óz boıymsyń, jarqyraǵan jaǵamsyń. Baılyq, shirkin, qaıda bolsa tabylar, Al baqytty otanyńnan tabarsyń!

Mamyq qarǵa mahabbat

Pa, shirkin! Jaýysyn –aı myna qardyń, Uǵatyn túri bar ma mynaladyń? Aq úlpek túsken saıyn alaqanǵa, Erıdi. Qımaı-qımaı jylap aldym.

Quıylyp kómeıime qum sharaby, Jaýar mA myna mamyq munsha taǵy Ulpa qar aımalasyp bir-birimen, Aldynda terezemniń muń shaǵady.

Shoǵyna qarańǵynyń kúıgen kózge, Mamyǵyń jaryq shashty tıgen kezde. Qudiret osy dedim kókten túsken, Betimdi jalaı ótip súıgen kezde.

Bıkten kóz tartady aspan andaı, Keýdesin áli eshkim baspaǵandaı. Aq mamyq túsip jatyr kókten táńir, Qıqymdap aq bulttardy tastaǵandaı.

Náp-názik ekpinimen qapalaqtap, Kók zeńgir tókken jerge apaǵat, pák! Appaq qar saǵan qarap sezbeı qadym, Aıazdyń jibergenin shapalaqtap.

Mahabbat saǵan degen mamyq álem, Men meniń aqtyǵyńa tabynar em. Uıqydan turǵan saıyn seni izdeımin, Tastap ket tap ózińdeı tańyma reń!

Daıyndaǵan: Birlesbek Saıagúl