Kúnnen-kúnge túrli formatta salynǵan aýdany kishkentaı  yqshamdy úıler kóbeıip, ondaı úılerge degen adamdardyń suranysy artyp keledi. Túrli qurylys kompanıalary da mundaı úılerden turatyn tolyq megapolısterdi salýdy qolǵa alýda, dep jazady Qamshy.kz aqparat agenttigi sheteldik BAQ-qa silteme jasaı otyryp.

Mysaly, Qytaıda mundaı úıler sý qubyrynan salynyp jatyr.

Qytaılyq James Law Cybertecture kompanıasy ádette sý júrgizý úshin paıdalanylatyn betonnan jasalǵan qubyrlardan úı salý jumysyn bastap ketken. Mundaı úılerdi qazirgi tańda OPod Tube House dep ataıdy eken. Mundaı úıler iri qala ortalyqtarynan páter alýǵa shamalary jetpeıtin, biraq zamanaýı úlgidegi úıde turǵysy keletin adamdarǵa arnalǵan, kólemi óte shaǵyn bolyp keledi.

Ádette olardyń ortasha aýdan kólemi 9,3 sharshy metrdi quraıdy jáne ol bir nemese eki adam úshin taptyrmas turaq-jaı bolyp tabylady. Qubyr dıametri 2,5 metrdi quraıdy, mundaı úıler tym kishkentaı bolǵanymen, munda yńǵaıly ómir súrýge ábden bolady. Qubyrdan salynǵan úılerdiń ishinde jınalatyn tósek orny men kishigirim as úı jáne de jýynatyn bólmesi bar.

Bul jobamen jumys istegen Djeıms Loý esimdi sáýletshiniń aıtýynsha, kishigirim qubyrdan salynǵan úıler ózderin pátermen qamtamasyz ete almaı júrgen jas otbasylar úshin taptyrmas múmkindik bolyp tabylady. Sonymen qatar, mundaı úılerdi bılik ókilderi kóshi-qon máselesin retteý úshin de paıdalana alatyndyǵyn atap ótti.

Qubyrdan salynǵan mundaı úılerdiń salmaǵy shamamen 22 tonnany quraıdy, alaıda bul olardy ornalastyrýǵa kedergi keltirmeıdi. Al eger de mundaı úılerden tolyq bir aýdan quraıtyn bolsa, olar ózara bir-birimen jaqsy birigip tura alady eken.